MDF-in Saiha district tan UT an duh

Mara Democratic Front (MDF) party chuan, Saiha district chu union territory-a hlankai a nih theih nan sorkar laipuiah nawr chhunzawm zel an tum.

MDF hian January 15, 2016 khan Saiha New Coloney Indoor Staduim-a Special Assembly an nei a; resolution pass in, Mara-te tan UT neih chu Mara hnam himna leh hmasawnna atan thil pawimawh a nih thu an tarlang.

MDF resolution chuan, union minister-te'n Mizoram an tlawhin 6th. Schedule area tlawh ve se an duh thu te, Mizoram Liquor (Prohibition and Control) Act, 2014 chu 6th. Schedule area-ah hman a nih ve loh avangin MADC area-a chengte hnena zu lei phalna permit pek chu cancel an duh thute a tarlang.

Indian Constitution-a 6th. Schedule siamṭhatna tura sorkar laipuiin hma a lak mekah, autonomous district council-te chu state hnuaia Finance Commission leh Election Commission hnuaia dah loin, sorkar laipui thuneihna hnuaia dah an duh thu an tarlang bawk.

MDF Special Assembly-ah hian kum 2016-2019 chhunga party hruaitu thar turte an thlang nghal a, inthlanna hi Saiha District MJA-in an buaipui. MDF president atan M Laiko thlan nawn a ni a; senior vice president-ah FC Kiahlei, vice president-ah K Chiama leh treasurer-ah C Vadyu-te thlan an ni.