Oil & Gas Conservation Fortnight hawng

Food, Civil Supplies & Con-sumer Affairs (FCSCA) department leh Petroleum Conservation Research Association (PCRA)-te
ṭangkawp huaihawtin nimin khan IPR Auditorium-ah tuialhthei leh boruak alh thei renchem inzirtirna hapta, 'Oil & Gas Conservation Fortnight 2016' hawnna hun hman a ni a, FCSCA minister John Ro-tluangliana'n a hawng.

John Rotluangliana chuan, oil leh gas humhim leh renchem awmzia sawifiahin, "Ṭha tak leh ṭangkai zawka hman te, thil tichhe tlem zawk leh environment vawnghim zawnga hman leh, ṭhangtharte tana hman tur a awm theih nana renchem a ni. Oil leh gas-te laih chhuah zawh hun awm thei a nih avangin mi tinin renchem thiam taka kan hman a ṭul," a ti.

FCSCA Minister sawi danin, India ramin energy a mamawh 16% chauh India ram chhunga dehchhuah a ni a, 84% chu ram dang aṭanga lak luh a ni.

Lirthei, thil siamna leh power plant-te'n boruak chhia tam tak a siam tih sawiin John Rotluangliana chuan, "Mihring leh thil nungte hriselna nasa takin a tichhia a. Greenhouse gas leh global warming-te a thlen
ṭhin. Oil company-te pawhin lirthei leh thil siamtute meikhu tihchhuah (auto emission norms) khuahkhirhna BS-III (Bharat Stage-III) chu September 2010-ah a duang chhuak a ni," a ti.

Eirawngbawlna gas chung-chang sawiin John Rotluangliana chuan, "Sorkar laipuiin SAHAJ (or e-SV) hnuaiah LPG connec-tion, ram puma online-a dil theih a duan hnuaiah December 2015 thleng khan connection 1,62,098 pek chhuah a ni tawh," a ti a; domestic LPG subsidy chu mire-thei leh mamawhtu dik tak hnen thleng tura ruahman a nih thu a sawi.

January 16-31 chhunga hman tur Oil & Gas Conservation Fortnight hawnna inkhawm hi FCSCA director HL Ro-chungnunga'n a kaihruai a; Mizoram Consumers Union leh All Mizoram Petroleum Dealers’ Association hruaitute pawhin thu an sawi a ni.