B Sairengpuii pisa kái tur an dang

Mizo Students' Union (MSU) leh an thawhpui pawl ṭhenkhatte chuan nimin khan Persons with Disabilities (PwD)commissioner B Sairengpuii pisa kai tur chu Chaltlanga a pisa kawtah an dang.

B Sairengpuii pisa kai tur dangtute zingah hian MSU bakah, Aizawl City College Joint Students' Union (ACCJSU) leh Mizoram Blind Society member-te an ni a, mi eng emaw zat an pung khawm. Pawl pathum presi-dent ṭheuhin thu an sawi a, chhun dar 12 velah an ṭîn darh a ni.

B Sairengpuii pisa kai tur an dan chhan hi sorkar aṭanga a pension hnua sorkarin PwD commissioner atan kum thum chhung atana a ruatna a tawp tawh hnuah, kum hnih dang, kum 2017 thleng commissioner ni tura a dah nawn leh vang a ni. Pawl pathumte chuan B Sairengpuii chu a hna aṭanga bang tura an phût bakah, Mizoram sorkar chu PwD commissioner ruatna lehkha sût turin an phût a ni.

MSU president PC Lalrinhlua chuan, sorkar hnathawk pension tur pawhsei leh rawih nawn an duh lo tih sawiin, "Pi B Sairengpuii rawih nawn leh hi a ni em em tawh lo. Amah pawh hian ṭhalai leh mithiam zawkte a ken ngei kan beisei tawh laia he hna a zawm leh hi mak kan ti a, a bàn ngei theih nan eng pawh huama hmalak kan tum a ni," a ti.

Mizoram Blind Society president Elvin Zothantluanga chuan, ''Keini rualbanlote hian kan pi B Sairengpuii hi kum 2012-a sorkarin an ruat aṭanga vawiin thlengin vawi khatmah kan la duh ngai lo a, kan dodal ṭhin a, mahse keini rualbanlo pawlte dodal hi sorkarin engahmah a ngai lo," a ti a; rualbanlote en-kawl thiam leh hmangaihtu PwD commissioner an duh thu a sawi.