Kumina lo hâl hun tawp - March 15

Sub-Committee on Fire Prevention chuan Fire Prevention Week, 2016 chu nimin khan an chairman, Enivironment & Forest minister Lal-rinmawia Ralte hoin a pisaah an ṭhukhawm a; kumina lo hâl hun hnuhnung ber atan March 15 an ruat a, thupek zâwm lote hremna dan khauh zawka kalpui an rel.

Meeting chuan, "Kum dang ang bawkin kumin hian lo hâl theih ni hnuhnung ber atan March 15 ni se. Hun tiam pêla hâl an awm ṭhin tih hriat a ni a, kumin hian dan bawhchhetute hremna dan khauh zawka kalpui tur a ni. Khaw ṭhenkhatin kângmei venhim kawngah nasa taka hma an sawn laiin, khaw ṭhenkhat erawh chuan an ti ṭha lo hle tih hriat a ni," an ti.

Meeting chuan, lo hal hun chungchanga hriattirna leh mipuite zawm tur thilte chu DC-te'n an district ṭheuhah an puan turin an dah a; thupek bawhchhetute chu hremna dan awmsa hmanga hrem tur a nih thu an tarlang.

Meeting-ah hian, Fire Prevention Week 2016 hman dan tur pawh rel a ni a, February 8-13 chhunga hman turin thutlukna an siam. Mipuite kângmei kawnga an fimkhur zawk nan a vawi khatna atan Fire Mascot-ah sakhi hman ni se, an ti.