Duhoma'n hmunphiah chíngtute Hlêp tur chhuhsakah sorkar a puh

ZNP president Lalduhoma chuan, Mizoram sorkar chu kut hnathawktute hamṭhatna dâl zawnga thil ti-ah leh hmunphiah chíngtute hlêp tur la hêk zawnga hmuhphiah hralh dan tur ruahmanah a puh.

Nimina ZNP pisaa inkhawmah thu sawiin, Lalduhoma chuan, "Mizoramah Congress sorkarin kut hnathawktute hamṭhatna tur dâl zawng leh hmunphiah chíngtute hlêp tur la hêk zawnga hmunphiah a mahal leh ta leh, mahalder atan Bhaga vai thlang a, work order a pe fel leh ta hi ZNP chuan a do tlat a ni," a ti.

ZNP President sawi danin, January 2016 hian Mizorama hmunphiah mahal turin Sakir, Bhaga chu Mizoram sorkarin thlangin, work order a pe tawh a, hmunphiah quintal 3,000 lei phalna pek a ni a, Mizoram sorkarah royalty cheng nuai 12.7 a lut dawn a ni. Hmunphiah hring kg. 1-ah sorkarin Rs. 4.23 zel hmunphiah chingtute a laksak dawn tihna a ni a; tunah hian mahalder Sakir chuan hmunphiah a la khawm mek a, a hnuaiah Mizo 6/7 vel a chhawr a ni.

Hmuhphiah hralhnaa Mizoram sorkarin chhiah (royalty) a lak chu sang an tih thu sawiin, Lalduhoma chuan, “Sorkar hian hmunphiah aṭanga royalty hi a ît hle a nih pawhin kg. khatah Re. 1, a hming mai maiin laksak se la, an hralh zat chhinchhiahsak ve mai se, royalty hi a sang hrim hrim a ni," a ti a; hmuhphiahah hian kum eng emaw zat chhung chu chhiah inpektir loh ṭhaa an hriat thu a sawi.