Chakma foreigner pun chak dan zir chiang tur committee din a ni

MZP chuan thu-chhuah siamin, Chakma foreigner pun chak danin an ngaih a tih ṭhat loh thu tarlangin, zirchian ngai nia an hriatte zirchiang tura sub-committee an din thu an puang.

MZP chuan Mizorama Chakma foreigner pung chak lutuk veiawm an tih thu sawiin, "Kum 2015 chhunga Tlabung damdawi-ina naupiang zawng zawng zinga n81% Chakma a ni ta mai hian ngaih a ti ṭha lo hle. An pun chak dan hian ngaih a ti ṭha thei loa, dan loa rawn pem lut an tam ta viau nia hriatna a piang lo thei lo," an ti.

Chakma-te Bangladesh aṭangin dan loa Mizoram chhungah an lut nasa hle tih chhiarpui aṭangin a lang thei nia sawiin MZP chuan, "Chhiarpui hmasa ber kum 1901 ah Chakma mi 198 lek an awm laiin tun dinhmunah chuan Mizoram chhungah Chakma mi 1,50,000 vel zet an awm tawh anga ngaih a ni," a ti a, an pun chak danah hian Bangladesh aṭangin dan loin mi ṭhahnem tak a rukin Mizoramah an pem lut tih a nemngheh thu an sawi.

MZP chuan ramri venghimtu BSF ten ram dang aṭanga hnam dang dan loa rawn pem lutte venna leh dapchhuah kawngah an thawh tur tak thawh nachang hria a, taimak chhuah lehzual turin an duh tih sawiin, "Ram venhimna kawnga an tih tur tak hria a, thawk turin kan beisei nawn leh a, dan loa rawn pem lut tur venna kawngah inthlahdah loa, an thawh tur tak ṭhahnemngai leh taima taka thawk turin kan ngen a ni," an ti.