Zawlnuam Sub Post Office Sawnna tur order copy hâl

Zawlnuam khuaa V/C hrang hrangte chuan an khuaa Sub Post Office, hmun danga sawn chhuah an duh loh lantir nan nimin khan Sub Post Office sawnna tur thupek (order) copy, Zawlnuam Sub Post Office kawtah an hâl.

Lehkha hâl huaihawttute hi Zawlnuam Joint V/C bakah, Zawlnuam Borai Veng V/C leh Zawmnuam Ṭhuampui V/C-te an ni. An thu-chhuah chuan, Zawlnuam chu Tripura leh Assam ramri hrûla awm, hmun pawimawh tak, BDO
ṭhuthmun a ni tih sawiin, "Zirna lamah college a awm a, highway ṭhain a pawh mai tur leh sumdawnna hmun pawimawh tak ni chho mek a ni," a ti.

Zawlnuam Joint V/C-te chuan, an khuaa Sub Post Office chu khaw tê zawka sawnna turin December 9, 2015-ah order chuah a ni tih sawiin, "Zawlnuam mipuite'n kan hrethiam lo a, kan rilru a na tak zet a ni," an ti a; order chhuah tawh chu sût ngei an phût thu leh, sût a nih theih nan hmalak zel an tum thu an sawi.

Thu dawn danin, Zawlnuama Sub Post Office hi Kawrthahah sawn tum a ni a, sawnna tur order copy hâl chu Zawlnuan Joint V/C chairman C Lalropuia'n a dep kai a ni.