Jail-a chaw nghei damdawi-inah dah

Lalramvela (43) s/o K Siamliana, Sihtlangpui, Lawngtlai district, Lunglei District Jail-a tâng mek chuan rorelna dik phûtin jail-ah chaw a nghei a, a chauh deuh avangin Lunglei Civil Hospital-ah enkawl mek a ni.

Thu dawn danin, Lalramvela hi a nupuiin ṭhenin, pasal dang a neihsan a; a nupui chuan amah pawngsualah a puh avangin Lalramvela chu man a ni a, December 12, 2015-ah Lung-lei Jail-ah dah luh a ni. Lalramvela chuan a nupui dâwta amah puhchhiaah puhin, a pawngsual lo niin a sawi a; a thubuai chinfel phût nan leh a dikna lan chhuahtir phûtin January 4, 2016 aṭangin chaw a ngei a, January 13-ah Lunglei Civil Hospital-ah dah luh a ni.

Lalramvela hi Mizoram police-a ṭang ṭhin, thil sual a tih vanga bân tawh a ni a, Myanmar ramah kum hnih chhung vel jail-ah a táng tawh niin an sawi.