Road Safety Week hman dan tur sawiho

State Level Road Safety Council chu nimin khan an chairman, Transport minister John Rotluangliana hoin a pisaah an ṭhukhawm a, Road Safety Week hman dan tur an sawiho.

John Rotluanglian-a chuan, Krismas leh kumthar vuakvetah lirthei chetsualna lian tham a thleng lo nia sawiin, lawm-awm a tih thu a sawi a, "Transport department leh Traffic enforcement-a thawktute thawhrimna avangin a lawmawm hle. Mipui leh bungraw phur chi lirthei khalhtute tan fimkhur a ṭul a, dan bawhchhiate chu Supreme Court rorelna angin licence cancel thlenga hrem theih a ni," a ti.

Meeting hian kumin atan Mizoram pumah Road Safety Week chu February 8-12 chhunga hman turin a rel a, au-hlâ atan 'Lirthei chetsualna laka kan fihlim theih nan a takin hma i la ang u' tih thlan a ni.