Health Minister bàn remti lo
Mizo National Youth Front (MNYF) chuan thuchhuah siamin, Congress party ṭhalaite'n Health minister Dr R Lalthangliana chu báng turin phût mah se, a bàn an remtih loh thu an tarlang.
MNYF chuan, tun hnaia Kolasib lam kawng chhiaa táng truck driver leh handyman-te zinga Covid-19 vei hmuh chhuah a ni chu pawi an tih thu an tarlang a, "Chutih rual chuan, Aizawl leh hmun dang an thlen hmaa hmuh chhuah a ni hi sorkarin rem hre taka hma a lâkna vang a ni a, lawmawm kan ti hle," an ti.
State páwn aṭanga rawn lut truck driver leh handyman zingah Covid-19 vei eng emaw zat an awm avanga Congress ṭhalaite'n Health Minister báng tura an nawr chu àwm lo an tih thu sawiin MNYF chuan, "CM Pu Zoramthanga kaihhruaina hnuaiah Health Minister leh sorkar hotu dang te, NGO leh mipui thawhhona avangin India rama hripui do lêtnaa che ṭha ber kan ni," an ti a; Health Minister thawhrimna leh hmalakna mipuiin an hmuh hmaih lo a, a bàn an remtih loh thu an sawi a ni.
MNF ṭhalaite chuan, India rama state zingah Mizoram chu Covid-19 vei tlemna ber leh thihpui la awm lohna state awmchhun an nih thu tarlangin, "Hei hi Mizoram sorkar hmalakna rah chhuah, mipui nena thawhhona ṭha tak vang a ni," an ti.