Dr. BR Ambedkar piancham lawm a ni

India danpui duangtu zinga sûlsutu, Dr BR Ambedkara piancham vawi 125-na chu nimin khan India ram hmun dang lawm a ni. Aizawlah pawh IPR Auditorium-ah Nehru Yuva Kendra, Aizawl leh Ministry of Youth Affairs & Sports bultumin lawm a ni a, Finance minister Lalsawta'n a hmanpui.

Lalsawta chuan tumruhna, chhelna leh taimakna nen hmathlir sang tak insiam a, theihtawpa ṭan la tur leh ram leh hnam tana mi ṭangkai leh chhuanawm nih tum
ṭheuh turin ṭhalaite a chah a, "Kan mamawh 90% sorkar laipuiin min tumsak ṭhin. Hetiang ringawt hian kan hnam kan tàwp thiang lo tih ṭhalaite'n in ngaihtuah a ṭul," a ti.

Minister chuan, Dr. BR Ambedkar chu India rama chi inthliarna ṭhat lohzia hre chiangtu leh hma latu a nih thu sawiin, hnam hnufualte (Scheduled Tribes, Scheduled Castes, Other Backward Classes) duhsak bikna danpuia dah a nih thu a sawi.

Dr BR Ambedkara chu hnam hnuaihnung a nih avangin harsatna tam tak paltlang a, mithiam leh mi ropui tak ni zui ta a nih thu sawiin, Lalsawta chuan, "Dr BR Ambedkara hriatreng nana hun hmanah Mizo hnam pum pawhin chi inthliarna nei lo a, zalenna karah, boruak ṭha leh leilung ṭha tak kan neih hi kan vanneihzia hria a, tun aṭanga dinhmun sang zawka ding thei tura theihtawp chhuah a ngai a ni," a ti.

Dr BR Ambedkara piancham lawmna hi NYK district youth coordinator Raj Kumar-i'n a kaihruai a, ṭhalai ṭhahnem tak an tel a ni.