Police-in fimkhur turin chah

Mizoram police-te chuan, tunlaiin misual, mi bum hmang, vairam aṭanga bank hnathawk anga insawia phone hmanga mi bum tur zawng an tam niin a tarlang a, fimkhur turin mi tin an chah.

Police thuchhuah chuan, "Heng misualte hian mi account aṭanga pawisa lak chhuahsak an tum ber a, mobile phone, Bihar state-a register-te hmangin bum tur zawngin mi hrang hrang an be kual ṭhin," a ti.

Police-te tarlan danin, misualte chuan bank-a thawk anga insawiin, intihrinawm nan PIN number chu mimal thil a nih avangin an dil duh lo a, ATM Card number an dil ṭhin thung. ATM Card number an neih hnuah SMS-a One Time Password (OTP) an dil leh a, chumi hmang chuan mi pawisa hmansakin an lakchhuahsak ṭhin a ni.

Police-te chuan, ATM Card number leh PIN emaw, password emawte chu a neitu chauhin a hriat tur a nih thu sawiin, mi bum hmangte laka fimkhur turin mi tin an chah a ni.