Zeng hri danna pe ṭan

Kumina a thawh khat nan ram pumah naupang kum nga hnuai lam hnenah zenghri laka invenna (polio vaccine) pek ṭan a ni. Mizoramah pawh pek ṭan niin, Aizawlah chuan Health minister Lal Thanzara hoin Zarkawt Health Sub-Centre-ah naupangte hnenah zenghri danna pek a ni.

Health Minister chuan, Mizorama naupang kum nga hnuai lam mi 13,11,170-te chu zeng hri venna pek kim vek tum a nih thu sawiin, "Health department lamin theihtawp a chhuah mek a. Zenghri venna pekna hmun (booth) 1,312 siam a ni a, kan fate hriselna ngaih pawimawh leh an ṭhanlen zelna kawngah vaccine lak hi kan tih ngei tur a ni," a ti.

Lal Thanzara chuan, India ram chu zeng hri awm lohnaa puan ni tawh mah se, ram ṭhenawmahte zeng hri venna an kalpui
ṭha tawk em tih hriat a nih loh vangin India ramah kalpui zel a la ni tih a sawi a; naupang kum nga hnuai lam nei zawng zawngte chu zenghri venna la vek turin a ngen.

Inkhawma tarlan danin, kum 2015 khan zenghri venna, oral polio vaccine hi naupang kum 5 hnuai lam pek tur a beisei 1,30,762-ah naupang 1,30,313 hnenah pek a ni a, chu chu 99.7% a ni.