March-ah Food Security kalpui ṭan beisei

Food Civil Supply & Consumer Affairs (FCSCA) minister John Rotluangliana chuan, Food Security Act hnuaiah Mizo mipuite'n March 2015 aṭangin buhfai an lei hman an beisei thu a sawi.

FCSCA department-a thawkte'n nimina inhlan tharna hun an buatsaih a hmanpuinaah thu sawiin, John Rotluangliana chuan, "Food Security atana inbuatsaihnaah thawktute inpeknaa fakawm hle. He scheme hi February thla chhunga ṭan hman tum ni mah se, March thlaah a taka hman theih beisei a ni. FSA hnuaiah hian thingtlanga chhungkaw 80% chuangin buhfai a tláwmin an lei thei ang," a ti.

FCSCA Minister chuan, kum hnih chhungin an department-ah thil nasa taka a danglam thu sawiin, "Buhfai quota bak kan lei belh ṭhin pawh nasa takin a tlahniam. Mipui, VIP leh a thawktu ngeite pawh special permit kan pek tak loh avangin sorkarin sum tam tak a hum thei a ni," a ti a; thawktute chu fûrpui thlen hunah khaw kilkhawr ber thlenga buhfaia an mangan lohna atana ṭan la chho turin a chah.

Inkhawma tarlan danin, FCSCA department hian budget leh sale proceeds aṭangin cheng vbc. 30 chuang hlâwkna an hmu tawh a ni.