KHAWTHLIR

Hna zawm

Mizoram Civil Services (Combined Competitive) Examinations, 2015-a tling MCS, MPS leh MIS-te chuan hna an zawm chho mek. MCS-a tlingte hi January 18, 2016 khan appoinment pek niin, district hrang hrangah SDC turin dah an ni a; MPS-a tling mi pangate chuan January 17 khan NEPA an zawm. MIS-a tling mi palite chuan kum 2015 khan hna an lo zawm tawh a ni.

MCS sîksâwi

Mizoram sorkar chuan Mizoram Civil Service (MCS) officer, senior grade mi 17-te awmna a sîksawi a, MCS junior grade mi 13-te awmna a sîksawi bawk. MCS mi 30-te transfer order hi nimin khan DPAR secretary V Lalremthanga'n a chhuah a, an awmna thar tura insawn nghal tura hriattir an ni.

NLUP sem

AH&Vety department chuan nimin khan Lungleia an complex-ah NLUP hnuaia ar leh vawk vulh thlangtu, Lunglei East leh Lunglei West cluster-a chhungkaw 43-te hnenah NLUP second phase final instalment an sem a, Rs. 1,22,78,650 an sem ral a ni.

MJA inhlan tharna

Mizoram Journalist Association (MJA) general headquarters chuan vawiin chhun dar 12 hian Aizawl Press Club-ah kum thar atana Pathian hnena inhlan tharna leh thingpui inhona hun a buatsaih dawn a, MJA member, Aizawla awm mekte chu tel vek tura beisei an ni.

Rs. 6,29,781 bo

Aizawl New Market Office chhinchhiah danin, kum 2015 chhung khan New Market leh a chhehvelah pawisa bo report Rs. 6,29,781 a awm a, chu'ng zinga Rs. 1,00,470 chu hmuh let a ni. Mobile handset tibo 12 awmin, 10 hmuh let a ni a; voter ID bo 24 zingah 15 hmuh let a ni. ATM card bo 27 zinga 19 hmuh let a ni a, driving licence bo 17 zinga 14 hmuh let a ni. Heng bakah hian, nihliap,
ṭhi, zungbun, PAN card, SIM card leh liquor card tihbo report a awm bawk.