Covid-19: Mizoram dinhmun Ni 2 chhungin positive mi 71

Ni hnih chhung - October 2, Zirtawpni leh October 3, Inrinni khan Mizoramah Covid-19 vei mi 71 hmuh chhuah a ni a, ni hnih chhung vek - Inrinni leh nimin khan hripui laka fihlim tawh mi 32 chhuahtir an ni thung.

October 2 khan Covid-19 positive mi 54 hmuh chhuah a ni a, October 3-ah mi 17 hmuh a ni. October 2-a hmuhte chu - ZMC laboratory-a hmuh mi pathum leh TrueNAT PCR hmangin district pali-ah mi 51 an ni a; Inrinnia hmuh chhuahte chu TrueNAT-PCR hmanga district palia hmuh chhuahte niin, ZMC laboratory leh RAT hmanga endik zingah hripui vei an awm lo.

Inrinni khan hripui vei, enkawl hnua vei tawh lo mi 13 chu chhuahtir an ni a; New MLA Hostel CCC aṭangin mi pahnih, Montfort School CCC aṭangin pali, Nursing School, Serchhip aṭangin panga leh Lawngtlai CCC aṭangin pahnih an chhuak a, chhuak zingah MLA Dr BD Chakma a tel.

Nimin khan mi 19 chhuahtir leh an ni a, CCC hrang hrang - Berawtlang aṭangin 10, Serchhip Nursing School aṭangin pathum, Lunglei Pûkpui aṭangin pali Zobawk leh Mamit aṭangin pakhat ve ve a ni.

Mizorama Covid-19 vei mi 2,120 hmuh chhuah a ni tawh a, mipa 1,753 leh hmeichhia 367 an ni. An zinga mi 1,791 (84.48%) an chhuak tawh a, enkawl mek mi 329 (15.52%) an awm. La chhuak lo zingah hripui an vei tawh lo an awm nual bawk.

October 2, 2020 khan ZMC laboratory-ah RT-PCR hmanga mi 454-te swab sample endik aṭangin Covid-19 vei mi pathum hmuh a ni a; an vaiin Bawngkawn veng mi, Mizoram chhunga kai chhâwng (local positive contact) niin, mipa naupang kum 9 mi leh hmeichhia kum 29 leh 36 mi an nih thu sorkar thuchhuahin a tarlang.

Lunglei Civil Hospital laboratory-ah Zirtawpni khan Covid-19 positive mi 33, symptom nei lo vek hmuh chhuah a ni a, sipai vek niin, BSF 26 leh Assam Rifles pasarih an ni. BSF mi 26 zinga 25 chu tun hnaia state páwn aṭanga rawn lut an nih laiin, pakhat chu Mizorama awm sa, tun hnaia zin chhuak lo a ni thung. AR sipai pasarihte pawh tun hnaia state pawna chhuahna nei lo, an hmun - Kawmzawl, Lungleia awm an ni bawk.

Sorkar thuchhuah tarlan danin, Serchhip District Hospital-ah mipa pahnih, kum 19 leh 20-a upa, Assam aṭanga rawn lut, Lushai Engineers hnuaia thawk, quarantine facility-a awm lai hmuh chhuah a ni a; Mamit District Hospital-ah mipa kum 23 mi, Tripura aṭanga rawn haw, khung hran mek hmuh belh a ni.

Lawngtlai District Hospital-ah pawh mi 15 (mipa 14 leh hmeichhia pakhat) hmuh chhuah a ni a; mipa 11 chu Border Roads Organisation (BRO) 71 RCC hnuaia thawk, tun hnaia Mizoram aṭanga rawn lut, khung hran lai an ni a; mipa dang pathum chu company-a thawk an ni. Hmeichhia pakhat erawh chu Chawngte khaw mi, tun hnaia Silchar, Assam aṭanga rawn haw a ni thung.

October 2-ah hian ZMC-ah mi 454, TrueNAT hmangin district parukah mi 121 leh RAT hmangin district pariatah mi 533 endik an ni a, an vaiin mi 1,108 an ni.

October 3, Inrinni khan ZMC-ah mi 169, TrueNAT-PCR hmangin district pakuaah mi 165, RAT hmangin district parukah mi 366, an vaiin mi 700-te swab sample endik a ni a, Covid-19 positive mi 17 hmuh chhuah a ni. Tun hnaia Mizoram páwn aṭanga rawn lut vek an nih thu, sorkar thuchhuahin a tarlang.

Lunglei Civil Hospital-ah mi 13 hmuh chhuah niin, Mélte-a awm BSF sipai 12 leh Indian Air Force mi pakhat an ni a; an vaiin Covid-19 symptom an nei.

Champhai District Hospital-ah civil mi, mipa pahnih hmuh chhuah an ni a, tun hnaia Guwahati aṭanga haw, quarantine facility-a awm lai an ni. Lawngtlai District Hospital-ah mipa kum 23 mi, RK-RPP road construction company-a engineer niin, Mizorama rawn lut thar a ni. Mamit District Hospital-ah hmeichhia kum 64 mi, Thinghlun khua, Assam aṭanga haw hmuh chhuah a ni bawk.