Sorkar hotute intiamna tihhlawhtlin phûtin zirlaite kein Thingsulthliah-Aizawl an kal: Khaw paliah adhoc grant-in-aid phutin kawng an zawh

Thingsulthliah Higher Secondary School (HSS) zirlaite chu sorkar laiin MLA inthlan dawna an intiam anga an sikul adhoc grant-in-aid-a dah phutna atan, nimin khan Thingsulthliah aṭanga Aizawl dai thleng keiin an kal. Khaw paliah chuan an khaw HSS adhoc grant-in-aid-a dah phutna atan kawng zawh a ni.

Thingsulthliah HSS zirlai 42 te chuan zing dar 6 aṭangin Thingsulthliah Diakkawn aṭangin kawng an zawh ṭan a, Thingsul Tlangnuam leh Seling aṭangin zirlai eng emaw zatin an rawn zawm. Aizawl dai thlenga kawng rawn zawhte hi mi 111 niin, Chief Minister leh Education Minister lehkha pekna-a kal lo tur zawngte chu nimin tlai khan an khaw panin motor-in an let leh nghal.

Zirlai kawng zawhte hi MSU hruaitute chuan Aizawl khaw daiah lo hmuakin, CM leh Education Minister hmu tura chambang turte chu an lo buaipui a ni. Vawiin hian Thingsulthliah HSS adhoc grant-in-aid a dah ngei tura phutna lehkha CM leh Education Minister pek an tum dawn.

Thingsulthliah HSS zirlaite'n kea Aizawl an pan thlawpna lantirna atan Thingsulthliah khaw chhunga zirna-in leh office zawng zawngte zing dar 9 aṭanga chhun dar 1 thleng khar a nih bakah, Thingsulthliah Auto Rickshaw & Taxi Owner's Association member-te chu zing dar 9 aṭanga chhun dar 1 thleng an stand-ah an ding lo.

Phullen, Sakawrdai, Zawlnuam leh NE Khawdungseiah pawh an khaw HSS adhoc grant-in-aid a hlankai phutna atan khawtlangin kawng an zawh. Kum 20 chhung khawtlangin a enkawl tawh an khaw HSS chu an intiam ang ngeia adhoc grant-in-aid a dah turin sorkar an phut a ni.

An khaw HSS adhoc grant-in-aid a dah phutna atan East Lungdar-ah chuan zirlaiten khawlaiah banner an keng a, West Phailengah chuan no teaching day an hmang.

Tarlan tawh ṭhin angin Thingsulthliah HSS, Farkawn HSS, Zobawk HSS, Zawlnuam HSS, West Phaileng HSS, East Lungdar HSS, NE Khawdungsei HSS, Phullen HSS leh Tuisualral HSS-te chuan Mizoram Govt. Lumpsum Aided Higher Secondary School Association (MIGLAHSSA) dinin, an sikulte adhoc grant-in-aid a dah phutna atan a huhoin hma an la a ni.

MIGLAHSSA hian adhoc grant-in-aid dinhmuna hláng kai tura sorkar kar nan August 28, 2023 khan No Teaching Day an hmang a, August 29 aṭangin tiam chin awm loin sikul an khàr a ni.

Lumpsum HSS pakuaa managing board chairman-te chuan September 6, 2023 khan CM Zoramthanga chu a pisaah an hmu a, lumpsum grant-in-aid aṭanga adhoc grant-in-aid dinhmuna hlàn kai an phût chungchang an sawipui a ni.

School managing board chairman-te chuan, an sikulte chu khawtlangin an hahpui rei tawh­zia leh adhoc grant-in-aid an mamawhzia te, kum 2018 inthlan hmaa tuna sorkar (MNF kaihhruai) hotute intiamna anga tihhlawhtlin a nih loh chuan inthlan dawna hmalak a harsat dan turte an sawi.

Chief Minister chuan, sikul hrang hrang dinhmun sang zawka hlàn kai chungchangah tunah chuan thu chiang a la awm loh thu leh Cabinet-in a la ngaihtuah tur a nih thu a sawi a; lumpsum aided school pakua khàr mek chu titawp turin a lo ngen.

Managing board chairman-te leh MIGLAHSSA hruaitute chuan Chief Minister ngenna chu zahawm an ti a, Cabinet thutlukna ngaichâng chungin an hawng leh rih a ni.