Kuminah TB vangin mi 62 an thi ; TB vei enkawlna bik neih theih duh

National TB Elimination Programme (NTEP), State TB Cell chuan nimin khan Aizawl Press Club-ah MJA member-te pualin Tuberculosis (TB) chungchang inhrilhriatna hun an buatsaih a, kuminah TB avangin mi 62 an thih tawh thu tarlan a ni. NTBEP chuan TB veite enkawlna bik damdawi-in awm leh thei se an duhthu an sawi.

State TB officer Dr Vanlalfela chuan India ramah kum 2025 ral hma ngeiin TB umbo tum a nih thu a sawiin, "Kum 2024-a TB kan umbo theihna atana inkaihhruaina NTEP, State TB Cell pawhin guidance document 'Road Map to TB Free Mizoram lehkhabu a buatsaih a, March 24, 2023 khan Health minister Dr R Lalthangliana'n a tlangzarh. Mizorama district zawng zawngte an hmalak dan tur kimchang taka ziak a ni," a ti.

TB natna hi ei leh in ṭha hmu lo/ei lote nen a inkungkaih thuk hle tih sawiin Dr Vanlalfela chuan, "Ei leh in ṭha hmu loten TB an vei duh bik. Chutiang bawkin TB damlote pawhin an damloh chhunga ei leh in ṭha an hmuh loh chuan an dam chak thei lo," a ti a, sorkar chuan TB damloten TB natna an vei chhunga an ei leh in an tih ṭhatna atan Nikshay Poshan Yojana Scheme kaltlangin bank account-ah thla tin Rs. 500 a pe ṭhin.

Dr Vanlalfela sawi danin, Pradhan Mantri TV Mukt Bharat Abhiyaan Scheme chu belh lehin, he scheme hnuaiah hian TB damloten chaw ṭha an tihte donation hmanga pek an ni. TB vei pakhat thla 6 chhung sponsored theih a ni a, thla tin Rs. 700 thla ruk chhunga pek tur a ni. NTEP, State TB Cell chuan TB veite ei leh in tur sponsored turin mipui an sawm.

Zawhna chhangin NTEP, State TB Cell hotute chuan Zemabawka an hmun aṭanga sawn chhuah an nih hnuah TB veite enkawlna bik damdawi-in a awm tak loh thu sawiin, "TB veite enkawlna bik hi chu awm leh se duhthusam a ni. Natna inkaichhawn theih a nih bakah, damlo ṭhenkhat lo thinhrik tawkte an awm ṭhin. A hranpa awm leh se chuan, inenkawl a awlsam phah lehzual ang," an ti.