KHAWTHLIR

Thisen pe

Salvation Church Ṭhalai Pawl (SṬP) chuan Salvation Church din champha vawi riatna pualin Synod Hospital tan thisen unit 30 an pe a, a petute mipa 26 leh hmeichhia pali an ni.

CEO-in endik

Chief electoral officer Madhup Vyas chuan nimin khan Lawngtlai a tlawh a, kumina MLA inthlanpui neih tura inpuahchahna kalpui dan a endik. CEO chuan, voter 83% aia tlem loin vote an thlak theih nan theihtawp chhuah turin a chah a; Polling Station tinah inthlan hma ni thum chhungin duty leh vote thlak turte mamawh zualpui - eng chhit, tui intur, inthiarna leh kailawnte ruahman fel vek tur a nih thu a sawi.

Sikul hawng

School Education minister Lalchhandama Ralte chuan nimin khan Sakawrdai High School a hawng. Sakawrdai H/S hi kum 2019-ah din niin a building hi MLA Fund aṭanga sak a ni a; zirtirtu panga leh zirlai 65 an awm mek a ni.

Minister-in hmanpui

KM Higher Secondary School chuan nimin khan an sikul kawtzawlah Annual Sports kharna inkhawm an hmang a, minister Lalruatkima'n a hmanpui. Khawpuia Memorial (KM) HSS hi kum 1967-ah high school-a din niin, kum 1996-ah HSS-ah hlankai a ni a; zirtirtu 38 leh thawktu dang 10-in zirlai 700 vel an enkawl mek a ni.

Anaemia Camp

Khawzawl ICDS Project leh District Hospital ṭangkawp chuan nimin khan India rampum huapa Rashtriya Poshan Maah (Nutrition Month) hman mek pualin Khawzawl Middle School-II ah zirlai naupangten thisen an tlakchham leh tlakchham loh endikna Anaemia Camp an buatsaih a; zirlai naupang 56-te endik niin, an result a ṭha vek a ni.

Hmanrua dawng

School Education department chuan HDFC Bank CSR kaltlangin nimin khan smart class room paruk tan hmanrua a dawng a, Endala M/S, Venghlui M/S, Hnahthial High School, Muallianpui High School, NE Khawdungsei High School leh Tuisualral High School-ah dah a ni.

Nuho zirtir

Hnahthial District Election Office leh Mizoram State Rural Livelihoods Mission, Block Mission Management Unit ṭangkawp chuan nimin khan khan Systematic Voters Education & Electoral Participation pualin self help group nuhote tan inthlan chungchang hriat zauna leh voter-ten an vote hlutna te, vote thlak pawimawhnate an hriat theihna tur inzirtirna an buatsaih. Hnahthial RD Block-ah hian SHG 660 hnuaiah member 5,223 an awm mek a ni.

Mimkut

Social Welfare dept. chuan Ministry of Tribal Affairs aṭanga an sum dawn cheng nuai 20 hmangin September 29 khian Vanapa Hall-ah Mim Kut an buatsaih dawn. Nimina September 9 a hman tur anga tarlan kha ziah sual palh a ni e.

Inthlan sawipui

Siaha East-I MDC biala by-election neih tur atana inbuatsaihna kal zelah nimin khan district election officer Lalhmunsanga Hnamte, bawrhsap chuan Siaha-a thuthar thehdarhtute a kawm a; inthlanna kalpui tura thil pawimawhte a sawipui bakah, tluang taka inthlanna neih a nih theih nan thawhpuiah a sawm nghal a ni.

Infuihthar tum

Serchhip District Bharat Scouts and Guides Council chu nimin khan an president David Lalthantluanga, bawrhsap kaihhruaiin an ṭhukhawm a; Serchhip district-a Bharat Scouts and Guides unit pasarihte chu council hotute'n hun remchang hmasa berah tlawh chhuah ni se, an ti. Heng unit -te tan hian kumin kumtawpah infuihtharna leh intuaitharna Grand Campfire buatsaih tum a ni.