Hospital sak tur lungphum phum

Health minister Dr R Lalthangliana chuan nimin khan Serchhipah khum 100 awm theihna tur district hospital building thar sakna tur lungphum a phum a; Health department-a thawktu indaih lohna siamṭhat tuma hmalakna chu hripui leng vangin a sukuk thu a sawi.

Dr R Lalthangliana chuan, Mizoram sorkarin kum nga chhungin hriatlawk loh harsatna tam tak a hmachhawn tih a sawi a, "Health department-a thawktu indaih lohna nasa tak siamṭhat tuma hmalakna pawh hripui leng vangin a sukuk a, hetih mek lai hian doctor leh nurse-te a tahtawlin lak chhoh zel an ni a, ruahmanna pawh siam belh zel a ni," a ti.

Serchhip District Hospital building thar sakna tur sum hi Power Grid Corporation of India Limited (PGCIL) corporate social responsibility (CSR) fund aṭanga hmuh cheng nuai 2,100 senga sak tur a ni a, sum senso zawng zawng ruahman zat aṭanga nuai 252 hi hospital hmanrua lei nan hman tur a ni.

PGCIL leh Mizoram sorkar chuan May 27, 2022 khan inremna thuthlung an ziak a; thla 36 (kum 3) chhunga sak zawh tura ruahman niin, March 2025-ah peihfel hman tum a ni. A satu tur atan Mizoram State Works Advisory Board chuan Zamzo Engineering Construction and Consultancy, Aizawl a thlang a. Building hlui ṭhiah phalna leh ṭhiahna tur senso hi PWD ten Mizoram sorkarah an dil mek a ni.