Chief Secretary-in PÛM-2023 hawng

Labour, Employment, Skill Development & Entrepreneurship (LESDE) department-in Industrial Training Institute-a zir mekte, zir chhuak tawhte leh Mizorama kut themthiamna lama tui leh thiam thil neite tana a buatsaih, PÛM-2023, Innovation Competition & Exhibition Fair chu nimin khan ITI Campus-ah chief secretary Dr Renu Sharma-i'n a hawng.

Dr Renu Sharma chuan, inelna rilru tel lo chuan hmasawnna ṭha zawk leh kalphung ṭha zawk siamchhuah / hmuhchhuah a harsat ṭhin thu a sawi a, "He fair hming atana Mizo-ten kan hnam nuna hmanrua kan chherchhuahna hmun pûm thlan a ni hi hmalakna thiltum nen a inhmeh hle. Eizawnna kawng hawng turin kut themthiamna leh thil siamchhuah lama thiamna neite tan remchanna buatsaih a, mahni kutkawih ngeia ei an zawn theih nana hmalak zel chu sorkarin a ngai pawimawh a ni," a ti.

PM Vishwakarma Scheme leh LESDE hmalakna tam tak chuan inzulna a neih thu leh ṭangkai taka kalpui theih a duh thu Chief Secretary chuan a sawi a; ITI chu eizawnna atana zirna-in ṭha tak a nih avangin zirlai hmeichhia tam zawk an awm zel a beisei thu a sawi bawk.

PÛM-2023, Mizoram Innovation Competition & Exhibition Fair hi Ministry of Skill Development & Entrepreneurship (MSDE) hnuaiah LESDE department buatsaih niin, sorkar laipui scheme Skills Strengthening for Industrial Value Enhancement (STRIVE) leh Atal Incubation Centre-SELCO Foundation (AICSF) Guwahati te chu sum bultumtu an ni a; inelna hi ṭhuang hnih - engineering leh non-engineering group-ah ṭhen a ni.

Engineering-ah hian mi 28 leh non-engineering-ah mi 35, an vaiin mi 63 an tel. Sawm bik innovator leh entrepreneur stall hawng pariat an awm bawk.

Entrepreneurship Workshop hi vawiinah a duh a piang chhim turin chawhma dar 10 aṭangin buatsaih a ni dawn a, Exhibition Fair-a thil siamchhuah/phochhuah te hi mipui tan vawiin leh naktukah lei theiha chhawp a ni ang