Champhaiah SEDP thawhhnihna hawng

Champhai South bialtu MLA TJ Lalnuntluanga, minister of state chuan nimin khan Champhai Kahrawt Community Hall-ah Mizoram sorkar flagship program - Family Oriented Socio Economic Development Programme (SEDP) thawh hnihna a hawng.

TJ Lalnuntluanga chuan, SEDP chu programme huap zau leh fun kim a nih thu sawiin, "He programme hnuaiah hian ei leh bar intodelh, thil siam chhuah leh hralh chhuah, mihring theihna tihpun, mipui dinhmun dawm kan leh khawtlang nun nuam siam, hmasawnna ruhrel siam te a huam vek a ni," a ti.

Khualzahawm Dr ZR Thiamsanga, Champhai North bialtu MLA pawhin thu sawiin, ṭanpuina dawngtute chu an trade thlan ṭheuhah rim tak leh tih tak takna thinlung nen thawk turin a chah.

Hawnna inkhawm hi Champhai DC James Lalrinchhana'n a kaihruai a; Champhai district-a SEDP Phase 2 dawng tur, UDPA, Agriculture, AH&Vety, Horticulture, Sericulture, Fisheries, Commerce & Industries leh Land Resources, Soil & Water Conservation department hnuaia mi 4,522-te bank account-ah ṭanpuina cheng nuai 1130.50 sem a nih thu tarlan a ni.