Pathian hruai theih hruaitu kan nei - MPCC Treasurer

Aizawl South-II Block Congress chuan nimin khan ITI Veng YMA Hall-ah workers meet an hmang a, an hun hmanpuitu MPCC treasurer Dr Lalmalsawma chuan an party-in Pathian hruai theih hruaitu an neih thu a sawi.

MPCC Treasurer chuan kan ramin vawiinah hian eng nge a mamawh ber ti ila, Pathian hruai theih hruaitu a nih thu sawiin, "Congress-in Pathian hruai theih hruaitu Pu Lalsawta kan nei a ni. Kan ramah Ruihhlo a hluar em em a, Ruihhlo tawlhna kawngpui kan ni mek. Kan sawrkar sum harsatna avangin sumdawngten an tuar mek bawk a, kan ram kawngpuite a chhiat avangin transporter te pawhin rawn kal an hreh em em a, kan ram dinhmun hi a chhe hle a ni," a ti.

Pathian hruai theih party nih a ngaih thu sawiin Dr Lalmalsawma chuan, "Kan ram hi kan tu leh fate awmna tlaka kan siam a ngai a ni. Tuna kan kalphung angah hi chuan kan tu leh fate chan tur ngaihtuah ngam a ni lo. BJP thiltum te a hlawhtlin loh nana hma la thei awmchhun Party chu Congress chauh hi a ni," a ti a, Congress Party chu Mizo mipuite innghahna an nih mek thu a sawi.

Mi tam takin dinhmun chhe zawkte chawikanna hmalakna te an sawisel ṭhin nia sawiin MPCC Treasurer chuan, "Mi tamtak tanpui mamawh ngawih ngawihte ṭanpui hi Congress sorkarin a ngai pawimawh hle zawk a ni. Congress Party ngaihpawimawh chu mipuite an ni a, chuvangin Referal Hospital-te kan din a, medical college te kan din a ni," a ti a, Congress Party-in sorkarna a chan leh theih nan an party mite chu theihtawp chhuah turin a sawm.