CM candidate ṭha tak Duhoma kan nei hi kan vannei hle - ZPM Working President

ZPM chuan September 19, Thawhlehni zan khan Vairengtea an party election campaign office-ah vantlang inkhawm an buatsaih a, thusawitu ZPM working president K Sapdanga chuan an party-in chief ministerial candidate atana Lalduhoma an nei vanneih an intih thu a sawi.

K Sapdanga chuan sorkarna siam inbeisei political party pathum zingah unit ngah ber an nih mek thu sawiin, "Kan chin hre mang loten Aizawlah chuan in ṭha a, thingtlang lamah hian in ṭha lo deuh a ni an ti. Keini Zoram dung leh vang fanga zin tawhte erawh chuan Aizawl aia thingtlang lama kan chhiat zawkna kan hmu lo mai ni loin, kan ṭha zawk mah a nih awm hi maw kan ti," a ti.

Tunhnai inthlan awm reng rengah ZPM chuan Pathian malsawmna an chang chho ta zel ni a sawiin ZPM Working President chuan, "Boruakah chauh in ṭha tia min sawi ṭhinte hi vote hmangin a nih loh thu mipuiten an lantir zel a ni," a ti a, inthlana an chet ṭhat chhan chu an ṭhat bik vang ni loin, kalphung thar mipui sorkar chakin mipui an tuihal vang a nih thu a sawi.

ZPM Working President chuan thawhrimna an zawrh thu sawiin, "Sem hmanga ram chhanchhuah theih a nih loh thu kan tlangaupui a, kut hnathawktu sorkar din kan tum thu huai takin kan sawi. Heti taka ZPM party min hruaitu hian kawng laklawhah min tawpsan mai loang tih hi kan ring tlat. Mipui beiseina tithlawn lo turin ZPM chu kan inbuatsaih," a ti.

Mizoramah thil engkim mai a nih loh dan tur ang deuh vekin a kal ta ni a lan thu sawiin K Sapdanga chuan, "A lungchhiatthlak a; ṭhalaite mangangin nu leh pa te vote thlakna tur min kawhhmuh ta hial a ni. CM candidate ṭha tak Pu Duhoma kan nei hi kan vannei," a ti a, Lalduhoma hruaina hnuaiah ZPM-in Zoram ṭha zawk mipui an hmuhtir ngei an beisei tlat thu a sawi.