Zirtirtu pek belh phutin zirlai an pungkhawm

Serchhip Govt. Higher Secondary School (HSS)-a zirlaite chu zirtirtu pekbelh phuta kawngzawh tumin nimin khan an sikul tualah an pungkhawm a, Serchhip-a MNF Block hruaitute nen an inkawm hnuah sorkar hmalakna ngaihchan leh rih nise an ti.

Serchhip Govt. HSS-a zirtirtu ṭhenkhat chu thlaktu awm loa sawn an nih avangin he zirlai naupangte hi lungawi loin nimin khan kawngzawh tumin an sikul tualah an pungkhawm a, zirtirtu an mamawhna thuziak hrang hrang kengchhuakin, aiawh tur dah loa zirtirtu sawnchhuah an duh loh thute leh sorkar chu a din zirna inte ngaihsak tura an duh thu tarlanna thuziak te an keng a ni.

Hetianga zirlai te an punkhawm lai hian Serchhip East Block MNF hruaitute chuan he sikul hi MNF adviser J. Malsawmzuala Vanchhawng hoa tlawhin zirlaite hi an kawm a, an sikul zirtirtu indaih lohna chungchangah sorkarin hma a lak mek thu leh a ngheta thawktu dah a harsa a nih pawhin SEDP teacher dah tura ruahman a nih thute hrilhin, zirlaite kawngzawh an tum chu ṭhulh turin an ngen.

Zirlaite chuan sorkar hmalakna ngaichanga kawngzawh an tum chu ṭhulh rih remtiin, an thil phutte a hlawhtlin hma loh chuan sikul kai chunga zirna kalpui rih loh ni se an ti.

Serchhip GHSS zirlaite sawi danin, norms angin history-a zirtirtu pahnih awm ṭhin chu kum 2018-ah pakhat zawk superannuation pension-a a chhuah hnuin tun thlengin a aiawh tur dah a la ni. Mizo subject-ah arts tan pahnih leh science stream-ah pakhat neih ṭhin a nih laiin pakhat chu kum 2019-ah Govt. Central HSS, Aizawl-ah sawnin tun thlengin a aiawh tur dah a la ni lo.

Physics zirtirtu norms anga pahnih awm ṭhin chu kum 2021 kumtir ah pakhat sawnin a aiawh tur dah a ni lo a, chemistry-ah norms anga zirtirtu pahnih awm ṭhin chu tunhnaiah pakhat zawk sawn leh a ni.