PAHOSS sum nuai 4,987 K-deposit-ah; hnaruak 7,983 hnawhkhah a ni tawh

Mizoram sorkarin Aizawla traffic jam tihziaawmna tura a duan, Parking House Support Scheme (PAHOSS) hnuaiah ṭanpuina sum pek tura ruahman cheng nuai 6,139 aṭangin cheng nuai 1,124.80 pek chhuah tawh a ni a, K-deposit-ah cheng nuai 4,987 dah mek a ni. Tun sorkar term kal mekah sorkar hna post ruak 7,983 hnawhkhah a ni tawh.

Deputy chief minister Tawnluia chuan nimin khan Aizawl Press Club-ah thuthar thehdarhtute a kawm a; a department enkawl pathum - UDPA, PHE leh Department of Personnel and Administrative Reforms (DPAR) hnuaia hmalakna hrang hrang a sawi.

Tawnluia chuan, chief minister Zoramthanga'n Februaty 6, 2019 khan PAHOSS a hawn thu a sawi a, "PAHOSS atan hian sorkarin cheng nuai 6,139 min pe a, sum kan hman bak cheng nuai 4,987 chu K Deposit-ah a awm. Covid avang hian kan sum harsatnain min tlak buak a, sorkarin PAHOSS a chhunzawm hleithei ta lo," a ti a; PAHOSS hnuaia lirthei dahna sa tura thlan mi 403 zinga mi 11-te building hawn a nih tawh thu a sawi.

State Investment Programme Manage­ment Implementation Unit (SIPMIU) hnuaia Aizawl khawpui hmarlam chawm tura duan, 37 MLD Water Treatment Plant chu enchhinna (trial run) neih an tum hnai tih sawiin Tawnluia chuan, "A tui kan dawhna tur, ṭhalah pawh tui tam tak dahna tur chu ṭhal lai khan kan thawk hman lo. Tunah hian tui a tam a, kan inpeih thawkhat tawh avangin trial run pawh tih thuai kan tum," a ti.

Dy CM chuan, DPAR in kum 2019-2023 chhungin sorkar hna thar 954 leh CSS aṭangin 24 a siam thu leh hna ruak hnawhkhah 7,983 a awm thu a sawiin, "Post fillup-ah promotion aṭanga fillup 4,437, limited departmental exam aṭangin 1,304, direct recruitment-ah 2218 leh CSS-ah direct-a fillup 24 an ni," a ti.

Sorkar hna a nghet loa thawk zingah dah ngheh mi 2,013 an awm thu sawiin Tawnluia chuan, "Contract basis aṭangin a nghet (reguralisation)-ah mi 290, MR (provisional employee) aṭangin mi 1,687 leh workcharge aṭangin mi 36 an awm," a ti a; a nghet loa thawkte tan tun hmaa awm ngai lo hamṭhatna hrang hrang siam a nih tawh thu a sawi.

PAHOSS

* Ṭanpuina dawng tura dilna lut 1,456 zinga 403 thlan a ni.

* Mi 11 hnenah ṭanpuina pawisa pek zawh a ni tawh a, inhnukdawk 26 an awm.

* PAHOSS ṭanpuina hi instalment thum (40:30:30) a pek a ni.

* PAHOSS atan sorkarin cheng nuai 6,139 a pe.

* Mi 140 hnenah first instalment cheng nuai 890 pek a ni tawh.

* Mi 47 hnenah second instalment cheng nuai 200.60 pek a ni tawh.

* Mi 11 hnenah final instalment cheng nuai 34.20 pek a ni tawh.

* Sum pek tawh zawng zawng hi cheng nuai 1,124.80 a ni.

* PAHOSS sum cheng nuai 4,987 chu K Deposit-ah dah a ni.

* Ṭanpuina dawng tura inremna ziahpui tawh, first-third instalment pek mai theih mi 201 an awm.

* Sum pekchhuah tur zat hi cheng nuai 1,036.90 a ni.