Thingsulthliah HSS zirlaiten adhoc-a an sikul dah dilna CM-ah thehlut

Thingsulthliah Higher Secondary School (HSS) Students Union hruaitute chuan nimin khan adhoc grant-in-aided-a an sikul hlangkai tura ngenna chief minister Zoramthanga hnenah an thehlut.

Thingsulthliah HSS SU-te hian CM hnena an lehkha thehluhah hian, "I ho Council of Ministers-in ṭhut hunah, kan sikul hi adhoc grant-in-aid-a hlankai a nih ngei theih nan theihtawp min chhuahsak turin kan ngen a che," an ti.

Chief Minister hian Thingsulthliah HSS SU-te chu Cabinet Meeting-ah theihtawp a lo chhuahpui tur thuin a lo thlah nia thudawn a ni.

Thingsulthliah HSS tarlan dangte

▶ Sorkar enkawl sikulten admission fee leh monthly fee an chawi loh laia kan nu leh pa harsa ve te te, ni tin inhlawh chawp ṭhinten admission fee leh monthly fee an chawi reng ngai bik hi kan chhungkaw dinhmun nen a inrem lo.

▶ Hun rei tak khawtlang nu leh paten zirna kawnga ṭhahnem an ngaih vanga phurrit an lo in rochun tawh hi i sorkar chak tak hian adhoc-grant-in-aid hmanga min hlih kiansak ngei kan beisei a ni.

▶ Kan zirtirtute pawhin an vanglai hun ṭha zawng zawng kan sikul tan hian an lo hmang tawh a, anni pawh hi kan lainat ve hrim hrim.

▶ Sorkar hian kan nu leh pa, khawtlang mipuite kianga kum 2018 MLA inthlan dawna a lo tiam tawh avang khan mi dang han beisei leh chuàn tur kan nei lo a, chuvangin adhoc grant-in-aid tura theihtawp min chhuahpui chuan kan hlawhtlin ngei pawh kan beisei tlat a ni.