Pathian dah hmasa ram hruaitu kan mamawh - Lalsawta

Nimin khan Laila Hall, Siaha-ah Mara District Congress Committee (MDCC) special conference hman a ni a, an hun hmanpuitu MPCC president Lalsawta chuan Pathian dah hmasa ngam hruaitu Mizoramin a mamawh thu a sawi.

MPCC President chuan Kris­tiante tan sakhuana chu incheina a nive lo tih sawiin, "Kan sakhua chhanhim hi kan tih mak­mawh, mutmawh hnarmawha neih a ngai. Kristian sakhaw nuaibo tumtu BJP kan thawhpui dawn lo tih hnua thawhpui leh zel MNF party te, BJP thawhpui tur leh tur loh pawh chiang lo, ṭhiana siam tum a, Mizorama BJP an len theihna tura kawng sialtu ZPM-te hnuaiah kan ram, kan hnam leh kan sakhuana a him dawn lo, innghah ngamna an ni lo," a ti.

Mizoramin tuna a mamawh ber chu Pathian a nih thu sawiin Lalsawta chuan, "Pathian leh ram dah hmasa ngam hruaitu kan mamawh. Chhan hrang hrang avanga Congress chhuahsan tawhte leh Congress la ni ngai lote pawh kan ram, kan hnam leh kan sakhua humhim tur leh sorkar ṭha siam turin lo lêt rawh u," a ti a, Mizoram chu chênna nuam, eirukna-in a tihbuai theihte reng reng tana hmun a awm lohna sorkar din an tum thu a sawi.

Sum tam tak hmanga inthlan hmachhawn aiin ramin Pathiana rinna nghat chunga inthlan hmachhawn a mamawh thu sawiin MPCC President chuan, "Hei hi Congress party-in sorkar ṭha siam kan tum dan a ni," a ti.

Thusawitu dang Congress Legislature Party (CLP) leader Zodintluanga chuan, Siahaa hma­sawnna chhuanawm leh rotling tam ber chu Congress sorkar siam a nih thu sawiin, "MNF hian mumal taka hnathawh an nei lo. Congress sorkarin mirethei chenna in nei lo chhungkaw 500 chuang in a sak sak," a ti a; mi 1000 chuang sak sak tura ruahmanna kalpui a nih laiin MNF an sorkara, chu ruahmanna chu engmah bawhzuina a awm lo niin a sawi.

NLUP pawh party thliar hrang loin eizawnna nei lote hnenah chhungkaw sing têl ṭanpuina pek an nih thu sawiin, "MNF chuan cheng nuai 3, NLUP dawng tawhte pawhin an dawn leh vek tur tiam chungin Rs. 25,000 an sem ve nial nual. MNF sorkar hian a thuin lei an verh a, a thuin kawngchhawng an siam a, a thu in Assam Rifle an sawn chhuak a, a thu in missionary sang chuang an tir chhuak a, a thu in SEDP an sem a, a thuin damlo apiangte tana hman tur cheng nuai 2 an dah," a ti.

Khawmpui hi MDCC vice president TT Vakhu-in kaihruaiin, MPCC President chuan MLA inthlan lo awm tura Palak biala an party candidate atan IP Junior leh MADC by-election neih tura Siaha East-I biala ding turin F Lallawmawmate thlan an nih thu a puang.