Beiseina nung neitu kalkhawm kan ni - Lalduhoma

Lawngtlai District ZPM chuan nimin khan Areopagi, Lawngtlaiah vantlang inkhawm an buatsaih a, an hun hmanpuitu ZPM leader Lalduh-oma chuan ZPM chu beiseina nung neitu kalkhawm an nih thu a sawi.

Lalduhoma chuan ZPM chu party naupangte, tawnhriat pawh la ngah lo tak kalkhawm an nih thu sawiin, "Mi ṭhenkhat chuan beidawng kalkhawmte min ti ṭhin. Keini hi beidawng kalkhawm ni loin beiseina nung neitu kalkhawm kan ni. Beidawng kalkhawm tia min sawitute hi mi beidawng an ni zawk. An party-ah beisei tur awm si lo, chhuahsan hlei thei si loin laklawh takin an awm a ni," a ti.

Mizoram politics vir vel thlirin Zoramin kalphung thar hmel a hmu dawn nia a lan thu sawiin ZPM Leader chuan, "He kalphung thar hi mi ṭhenkhat chuan an huphurh em em a, nasa takin an do. ZPM-ah mithar duhawm tak tak an lo lut reng a, heng mite hi ram leh hnam hmangaih tak tak tute an ni," a ti a, ZPM zawmtute chu dik zawk leh ṭha zawk nia an hriat huaisen taka thlang ngamte an nih thu a sawi.

Lalduhoma chuan ZPM-te chu danglam bik turin an inzirtir ṭhin tih sawiin, "Kan ram leh hnam dinchhuahpui tur chuan kan danglam a ngai. Candidate-te pawhin eiru lo turin Val Upa Council hmaah thu kan tiam vek. Kan ram rorelnaa Pathian ram thlentir hi kan tum êm avangin thawhrim pawh kan thawkrim. Sum sem vang ni loin thawhrimna hmangin chunglam malsawm tlâk ngeiin chak kan tum," a ti.

Pathian zarah an lo sorkar a nih pawhin inthlan lo awm leh tur chu an hnathawh hmanga hneh leh ngei an tum tih sawiin, "Sum sem hian kan ram chauh ni loin kan rilru suk thlek thlengin a ṭha lo zawngin a nghawng nasa em em a, thawhrimna tel loa awlsam taka sum hmuh duhna rilru min neihtir," a ti a, sum sem chu kan ram leh hnamin a tawrh nasat thu a sawi.

ZPM Leader chuan Mizote hi hnam tih nuam leh thuawih thei tak kan nih thu sawiin, "Hruaituin ṭha tak leh dik taka ro a rel chuan kan zawm dual ṭhin. Kristian ram kan ni a, Pathian lehkhabu thianghlim (Holy Bible) zirtirna pawm leh zawm tute kan ni a, hei hian kan ram rorelnaah nasa takin nghawng a nei a ni. Kan Bible zirtirnaah pawh hian kan Pathianin he leia a lalram din chungchang chiang takin a ziak a, dik tak leh fel taka rorel hi inthawina aiin a pawm zawk a ni," a ti.

Sawrkar ṭha a din theihna turin Pathianin roreltu a ruat ṭhin tih sawiin Lalduhoma chuan, "A hriak thih ni loten lalna leh thuneihna an chan chuan ramin nasa takin a tuar ṭhin a ni. Ram rorelna sorkar ṭha lo nei reng chung sia biak-ina serh leh sang kalpuinaah hian kan Pathian hi a lawm chuang reng reng lo," a ti a, rorelna dik luipui anga luantir chu Pathian thuin a dah pawimawh hmasak fo thu a sawi.

ZPM vantlang inkhawm hi Lawngtlai District ZPM president MC Lalramchhana'n kaihruaiin, an party thuchhuahin a tarlan dan dan ZPM Leader hian an party-ah mi 992 a lawmlut.