Ram dangten an tih theih chu kan tih theih lohna chhan tur a awm lo - CM Zorama

Mizoram Finance and Account Service Association (MFASA) chuan nimin khan Woodland Hill, Zonuamah general conference an hmang a, an hun hmanpuitu chief minister Zoramthanga chuan ram dangten an tih theih chu Mizoramin a tih theih lohna chhan tur a awm loh thu a sawi.

Chief Minister chuan, tun hmaa central sorkarin khauh ang reng taka state sorkarte sum leh pai hman dan tur a duansak kha a thlah dul deuh tih sawiin, "State-te anmahni remhriatnaa hmasawnna kalpui thei turin min han tizalen hlek. Mah se, Covid-19 a lo thleng zui ta mai si a, hna kan thawhna tur sum leh pai min pek tur tam tak kan hmu thei lo zui ta a ni. Kum thum chhunga hmuh kan inbeisei kan hmuh leh theih tak loh kha vaibelchhe 3500 chuang a tling," a ti.

Harsatna avangin beisei ang takin hna an thawk thei lo tih sawiin Zoramthanga chuan, "Thawk thei ni ila chu tun kum nga chhung hian Mizoram hi sang takah kan awm ka ring. Pathian zarah hun ṭhate kan nei a nih ngai chuan kan rama resource awm ang angte haichhuak tam lehzualin kan ram hi nasa taka chawikan theih a ni tih kan hmuchiang a ni," a ti a; Pathianin engkim ṭhat duhna ram, ram ralmuang leh lehkhathiam tamna ramah Mizoram a siam thu leh economy lam la ṭha tâwk lo chu an hmabak pawimawh a nih thu a sawi.

Chief Minister chuan hma­sawnna tura hmabak an neihte chu chonaah ngaia, anmahni zawnah theihtawp lo chhuah zel tura MFASA member-te chahin, "Ram dangten an tih theih hi kan tihtheih lohna chhan tur a awm lo, rilru hmunkhat pua mahni zawnah ṭheuh hma la turin kan zavaia koh kan ni," a ti.

MFASA khawmpui hi vice president Ramchuana'n kai­hruaiin, president Vanlalsawma pawhin thu a sawi. Chawhnu lamah ro an rel bakah, hruaitu thar an thlang.