ZPM-in hmasawnna kawng a zawh zel - ZPM Working President

September 20, Nilaini khan ZPM campaign office, Bilkhawthlirah vantlang inkhawm buatsaih a ni a, thusawitu ZPM working president K Sapdanga chuan, ZPM-in hmasawnna kawng a zawh zel niin a sawi.

K Sapdanga chuan LMC inthlanah khan sum thiltihtheihna khenbehin a awm nia sawiin, "Chunglam hnathawh mipuite thinlungah a takin a lang a, ZPM thawhrim leh beih nasat em avanga hnehna chang kan ni lo. Vawiin thleng hian ZPM te hi chunglam khian nasa takin min hruai a, kan fel lo chung chung, kan ṭha lo chung chungin ni tin hian mi thar mi ṭhahnem takin min rawn zawm thar zel a ni. Kan khingpui te chuan engtin nge ZPM hi mipui rin loh turin kan siam theih ang tih an ngaihtuah," a ti.

Khawpuiah leh thingtlangah ZPM boruak chuan hmasawnna kawng a zawh zel tih sawiin ZPM Working President chuan, "Tun hnai inthlan awmah reng reng mak tak maiin hnehna kan chang chho ta zel mai a, kan thawh ṭhat kan chhuang thiang loa, kan ṭhahnem­ngaihna kan sawi ri ngam lo. Vawiin thlenga min hruaitu hian kawng laklawhah hian min thlahthlam loang tih hi kan ring mai," a ti a, chung lam hnathawh bawhzui turin an theih ang anga ke pen ve mai an nih thu a sawi.

Serlui biala ZPM candidate C Lalthanfela pawhin thu sawiin, "Pu Jimmy Laltlanmawia chu damlohna avanga candidate a nih theih dawn tak loh avangin Serlui biala ding tur hian kan hotuten min han ruat ve a, khaw hrang hrang te kan han fang kual ve a, kei êm chuan kalphung thar mipui sorkar hi ka phur chhuak zo awm lo mang ka ti hial. Serlui bialah hian hnathawh tur a tam hle mai a, vawiina development kan hmuh te hian a thlenna tur a thleng lo fo ni hian a lang," a ti.