Electric Veng Presbyterian Kohhranin an kum 60 tlin ruai nen an lawm
Electric Veng Presbyterian Kohhran, Aizawl chuan nimin khan an kum 60 (Diamond Jubilee) tlin an lawm a, tlaiah ruai ṭhehin, Synod Hospital-a damlo te, damlo awmpuitute leh thawktu an suah ve.
Electric Veng Presbyterian Kohhran hian Diamond Jubilee lawm nan Rs. 25,72,113 sengin Calcutta Mission Field-a Raidighi biak-in, Baduipur Pastor Biala mi an sak sak a, August 27, 2023 khan an hawng. September 3 khan an Diamond Jubilee hi an lawm ṭan a, September 16 khan vengchhung thianfaiin an hnatlang a, hemi ni hian Synod Hospital-a damlo a mamawh apiang hman atan thisen unit 42 an pe a, an veng mipuite tan a thlawna inentirna an buatsaih bawk.
September 24, 2023 zan khian Diamond Jubilee lawmna hi an khar dawn a, an pastor hlui, Synod Moderator Rev. Dr C Chawnghminglia’n Pathian thuchah a sawi ang.
Electric Veng Presbyterian Kohhranah hian member 3,342; dan zawhkim 2,677 an awm. An jubilee lawm nan hian kuminah Ramthar Field-a ringthar 60 neih tlin tumin hma an la a, ringthar 159 an nei.