Zirlai 36 hnenah chhawmdawlna sem

Mizoram Primary Teachers Association (MPTA) chuan nimin khan Zarkawt Community Hall-ah zirlaite chhawmdawlna, Students Endowment Fund an sem a, School Education minister Lalchhandama Ralte-in a hmanpui.

Lalchhandama Ralte chuan, MPTA-in zirlai harsate chhawmdawlna an sem chu ropui a tih thu a sawi a, "Midangte tana malsawmna nih aia hlu hi mihring dam chhanah a awm lo. MPTA hian service association-ah member a ngah ber a, thingtlang kilkhawr zawng zawng huap a ni naa, an hotuten an tamna chhuanga sorkar an dawr ngai lo hi an fakawm takzet," a ti a; MPTA-ten zirna tihhmasawnna atana sorkar an thawhpuina, thlawpna leh fuihnaah lawmthu a sawi.

Zirlaite chu chhawmdawlna an dawnte hmang ṭangkaia tura chahin Minister chuan, "Nangmahni fuih kaltu leh nawr kaltu atana hmang ang che u. Mi puitling, ramin ṭangkai taka a chhawr leh fa hrin manhla in ni thei tih hriain, taimakna leh tumruhna nen in zirna kawng zawh sauh sauh ang che u," a ti bawk.

Students Endowment Fund hi MPTA chuan zirlai naupang harsa chhawmdawlna dawng tura thlan mi 36 hnenah a hlan a, zirlaite hian Rs 5,000, t-shirt, kekawr leh lukhum an dawn ṭheuh bakah, anmahni hruaitu an chhungte nen haw lam leh kal lam senso (TA/DA) pek an ni.

Students Endowment Fund hi MPTA chuan kum 2022 aṭang khan a sem ṭan a, chhawmdawlna hi zirtirtute'n an thawhkhawm aṭanga sem ṭhin a ni.