STAM-in inkhawmpui an hmang

Science Teachers Association Mizoram (STAM) chuan nimin khan Synod Conference Centre-ah General Conference vawi 36-na an hmang a, School Education director Lalsangliana'n a hmanpui.

Lalsangliana chuan, Mizoram leh khawvelin zirlaite cho phura fuih thiam science zirtirtu a mamawh tih a sawi a; STAM president Dr R Lalengmawia pawhin an hmalak dan hrang hrang a tarlang. Zawhna siam dan changkang, Conceptual Understanding leh Higher Order Thinking Skills (HOTS) tih thupui zirho a ni bawk.

He hunah hian kum 2022 chhunga Mizoram Science Journal-a thuziak ṭha ber (best article)-ah Dr Vanlalhruaia Pachuau ziah - 'Engtinnge ramsa an kah mut ṭhin' tih thlan a ni a; thuziak thawh hlawk ber Dr Laldinpuia, MZU hnenah Best Contribution Award hlan a ni. Science zirna atana thawk ṭha Lalropuia Chinzah, New Siaha High School leh F Lalhmangaihthanga, Lunglei High School headmaster te hnenah chawimawina an hlan.

STAM inkhawmpuiah hian an president Dr R Lalengmawia kaihruaiin rorel a ni a, zirlai harsate chhawmdawl nan STAM Educational Foundation siam ni rawh se, tih te; Elementary School-ah science leh mathematics zirtir thei (qualified teacher) dah a nih theih nan hma lak ni rawh se, tih te; Pawl 4 leh pawl 8-te Promotion Exam-ah hian common questions hmanga exam buatsaih a nih theih nan hma lak ni rawh se, tih te; Zoram Medical College-ah PG Diploma zirna hawn a nih theih nan hma lak ni rawh se, tih leh, STAM bultumin Science Teachers Award siam ni rawh se, tih te an rêl a ni.

STAM-ah hian Primary School aṭanga University thlenga science zirtirtu member 528 an awm mek a ni.