PHC leh sub-centre tan Energy for Health hawng

Health & Family Welfare minister Dr R Lalthangliana chuan nimin khan Zemabawk Urban Primary Health Centre-ah nizung chakna hmanga kawlphetha pechhuak tura hmalakna 'Energy for Health' a hawng. Energy for Health hi SELCO Foundation, Mizoram leh Health department inremna angin health centre 300 chuangah kalpui tura ruahman a ni.

Dr R Lalthangliana chuan, Energy for Health chu kumin 2023 ral hma ngeiin Mizorama health centre 300 chuangah dah tura hmalak a nih tur thu a sawi a, "Cheng nuai 3-8 thleng zel senga nizung chakna hmanga hnathawhna atana kan mamawh kawlphetha pechhuak tura hma lak a ni tur hi a lawmawm a, PHC leh sub-centre hrang hrang, kawlphetha hmuh ṭhat loh vanga buai châng tâwk ṭhinte tan thil lawmawm tak a ni," a ti a; nizung, luiluang chakna leh renewable sources of energy dangte hmanga kawlphetha siamchhuah uar deuh deuh a pawimawh thu a sawi.

Health department leh SELCO Foundation nena an thawhhona chuan Mizoram tan hriselna kawnga hmasawnna pawimawh tak a nih tur thu sawiin Minister chuan, "Mipui hriselna sorkarin a ngai pawimawh a, ngawrh takin kawng hrang hrangah hmalak zel a ni dawn," a ti bawk.

NHM Mission director Dr Eric Zomawia pawhin thu a sawi a; Energy for Health hian Mizorama PHC zawng zawng leh sub-centre ṭhenkhat a tuam sawn a ni. PHC pakhat atana sum hman tur hi cheng nuai 7-8 niin, sub-center pakhat tan cheng nuai 3-4 ni tura ruahman a ni.