World Alzheimer’s Day pualin kawngzawh

Nimin kha World Alzheimer’s Day a ni a; he ni pual hian zing karah Health minister Dr R Lalthangliana hoin Chanmari kawn aṭanga Millenium Centre inkarah Memory Walk neih a ni.

Alzheimer's & Related Disorders Society of India, Mizoram Chapter president Vanneihtluanga kaihhruaiin Millennium Centre kawtah inkhawm tawi buatsaih a ni a; September 2022 - September, 2023 chhunga an member thite sunna hun hman niin, thutiam an sawirual bawk.

Kumin World Alzhei­mer’s Day thupui chu 'Never too Early, Never too Late’ (Hma luat a awm lo, tlai luat a awm lo)' tih a ni.

Dr R Lalthangliana chuan, Alzheimer leh a anpui natna tuarte a tawrhpui thu leh a enkawltuten hrethiam tak leh hmangaih taka enkawl zel tura fuihna thu a sawi a, "Rilru leh taksa hrisel tur chuan kan hriselna kan ngaih pawimawh a, ei leh in kan fimkhur bakah taksa insawizawi a ṭul a ni," a ti a; Alzheimer's veite enkawl danah chhungkua, ṭhenawm khawvengte leh khawtlang hriatthiamna, enkawl thiamna leh inṭawiawm tawnna a pawimawh thu a sawi.