KHAWTHLIR

CIC thar tur John Neihlaia

Governor chuan nimin khan Mizoram chief information commissioner (CIC) atan tunhnaia IGP aṭanga pension John Neihlaia, IPS (Rtd.) a ruat a, remchang hmasa berah lakluh a ni ang. CIC ni lai Lalnunmawia Chuaungo, IAS (Rtd.) in banna a thehluh hnuah hun eng emaw chen CIC an awm lo a ni. Nimin vêk khan Governor hian Mangjangam Touthang, IIS (Rtd.) chu information com-missioner atan a ruat.

Thisen pe

Central Higher Secondary School NSS volunteer-te chuan nimin khan Civil Hospital, Aizawl Blood Bank-ah thisen unit 5 an pe.

Mizo ṭawng zirho

Art & Culture department leh Mizo Academy of Letters (MAL), Aizawl ṭangkawp chuan nimin khan Chanmari YMA Hall-ah 'Mizo Ṭawng Zirhona Seminar-2023' an buatsaih a; Art & Culture minister R Lalzirliana'n a hmanpui. R Lalzirliana chuan, MAL-in Mizo ṭawng humhalhna kawngah leh hmasawnna tura hma an lo lak tawhnate fakawm a tih thu a sawi. Seminar-ah hian college leh sikul naupang engemawzat an tel. Rozama Chawngthu buatsaih ‘Mizo ṭawng kalphung leh nihphung’ tih leh Dr Darchuailova Renthlei buatsaih ‘Mizo ṭawng kauchheh leh ziak dan dik’ tih chu zirho a ni.

NQAS Certificate

India rama hospital ṭha zual leh damlote tana him tehna, National Quality Assurance Standard (NQAS) hmanga endiknaa 89.38% hmutu Aibawk PHC leh 84.78% hmutu Thingsulthliah PHC-te hnenah tunhnai khan NQAS Certificate pek a ni. Mizorama damdawi-in zingah Civil Hospital, Aizawl chu kum 2017 khan NQAS Certificate hlan niin, India rama district hospital zingah NQAS Certificate dawng hmasa ber pahnihte zinga mi a ni. Civil Hospital, Aizawl hnuah ITI Veng UPHC chuan kum 2019 khan a dawng tawh bawk.