2015-ah Kelkang tlawhtu mi 2,31,027

Kum 2015 chhung khan Kelkang harhna chhima kal mikhual riak lût inhriattir mi 2,31,027 an awm a, tun thlengin mi 2,39,900 chuangin an tlawh tawh. Tunlai tak erawh chuan mikhual an tam lo.

Kelkang Presbyterian Kohhran upa T Papianga'n Vanglaini palai a hrilh danin, Kelkang Kohhran hi an la hlim reng a, zan tin an la inkhawm a, harhna chhima kal mikhual erawh tunlaiin an tam lo a, mi 100 an tling ngai meuh lo thung. Nikum lama mikhual an tam vanglai ang thoin an hmun thianghlima
ṭawngṭaite erawh an la kalpui reng a ni.

Kelkang harhna chhim hian kum 2015 chhunga kal zat chu mi 2,31,027 anga chhinchhiah an ni a; chungte chu kohhran pawl hrang hranga mi te, Mizoram chhung hmun hrang hrang leh India ram chhung leh páwn aṭanga kalte an ni.

Nikum chhunga ni khata mikhual riak lut reception counter-a inhriattir an tam ber ni chu March 30 a ni a, hemi ni hian mi 4,680 an lut a ni. March 30-ah hian Kelkanga lut thar leh a awm sate nen mi 8,314 an riak a; lehlánga kal mi 1,500 vel an awm bawka ngaih a ni.

Kelkang harhna chhimtute hi a tam ber chu Pathianni châm loin an kal a, ṭhenkhatte erawh chu Pathianniah an chám thung. Pathiannia mikhual tam ber ni chu June 15 a ni a, mikhual 2,517 an awm.

Kelkang hi Mizoram chhunga khaw hrang hrang 458 aṭangin tlawhtu an awm a, khaw ṭhenkhat chu vawi khat mai duhtâwk loa kal nawnte an ni.

Kelkang harhna hi India ram páwn aṭangin mi 43-in an chhim a, Mizoram páwn aṭanga kal zat chu mi 2,827 an ni.

Kelkangah hian chhungkua 137 an awm a, chawhrualin kum 2015 chhung khan in tinin mikhual 1,686 ṭheuh thleng ang an ni. Kuminah erawh chuan kohhran chhungkua pathumin an pung a, chhungkua 140 an awm.