Rangvamual, Hunthar Veng, Venghlui Lei tlahniam siam ṭhat dan tur sawiho

January 19, 2016 khan minister Lal Thanzara hoin a pisaah Rangvamual, Hunthar Veng leh Venghluia lei tlahniam leh leimin thawm ṭhat dan tur sawiho a ni.

Lal Thanzara chuan, "Tlang rama chêng kan nih avangin leimin leh lei tawlh theihna hmunah chhiatna thleng mai thei lakah kan inven a ngai. Kawngpui leh kan chenna vela tui luankawrte a ṭha em tih enfiah fo a ngai. Fûr ruahtui tlak hma ngeiin a bik takin Hunthar Veng, Rangvamual leh Venghlui lama lei che ṭhin hi ngaih pawimawh hmasak phawt a ṭul a ni," a ti.

Disaster Management & Rehabilitation (DMR) minister C Ngunlianchunga pawhin thu sawiin, veng pathuma lei tlahniam leh min ṭhin hmunte thawm
ṭha tur leh hmalak dan tur kawngah rilru sâwr binga ngaihtuahho a ngaih thu a sawi a; ram awm dan ruangam an zir dan leh hmuh dante a sawi.

Meeting-a tarlan danin, Hunthar Veng lei tlahniam chu tun maia siamṭhat nan PWD aṭangin cheng nuai 49 beisei a ni a, January 2016 chhung ngeia hna thawh ṭan tum a ni.

Venghluia leimin thawm ṭhat nan cheng nuai 97 ruahman a ni a; Rangvamuala leimin venna leh kawng chei ṭhaa zauh nan, a zualpui atana hman turin DMR
aṭangin cheng nuai 20 ruahman niin, fûrpui hma ngeia bul ṭan tum a ni.

Meeting-a hian DMR secretary PC Lallawmsanga, PWD engineer-in-chief C Vanlaltluanga, Aizawl DC Dr Franklin Laltinkhuma leh DMR director C Lalpeksanga te an tel.