Naupang kumtling lote hnena Vaihlo petu hremna dan siam thar

The Juvenile Justice (Care and Protection of Children) Act, 2015 chu January 15, 2016 aṭanga hman ṭan turin Ministry of Womens and Child Development chuan a siam a; he dana Section 77 angin, naupang, kum tling lote hnenah vaihlo leh a kaihhnawih pek leh hralh khap a ni.

Mizoram State Tobacco Control Society (MSTCS) hotute hnen aṭanga thu dawn danin, COTPA 2003 Section 6 hnuaiah zirna in
aṭanga ft. 300 huam chhungah vaihlo aṭanga siam chhuah reng reng zawrh khap a nih bakah, kum 18 hnuai lamte hnenah hralh khap a ni. Mizoram bikah chuan vaihlo leh a kaihhnawih a mala zawrh khap a ni bawk.

Hetih lai hian, naupangte hnena zûk leh hmuam hralh leh pek khap ni mah se, dan bawhchhetute hremna a ṭha tawk lo a; chuvang chuan Juvenile Justice Act, 2015-ah a hremna dan khauh leh na zawk siam a ni. Dan bawhchhetu chu kum sarih thleng tàntir leh Rs. 1,00,000 thleng chawitir theih a ni.

MSTCS chuan, Juvenile Justice (Care and Protection of Children) Act, 2015 hnuaiah naupangte hnena vaihlo leh a kaihhnawih khuahkhirhna dan bawhchhiate hremna tur siam a ni ta chuan vaihlo leh a kaihnawih ṭha lo laka naupang venhimna a tihchak lehzual ngei an beisei thu an tarlang.

MSTCS chuan, vaihlo leh a kaihhnawih thilte'n Mizo hnam a suat nasat bakah, tawrhna a thlen nasat tawh hle nia sawiin, Mizo mipuite chu lungrual taka
ṭang tlang a, vaihlo leh a kaihhnawih thilte do turin an sáwm a ni.