Zirtirtu zingah sikul computer Mahni tana hmang an awm: H Rohluna

School Education minister H Rohluna chuan, zirtirtu ṭhenkhat, sikul atana computer an dawn mimal tana hmang an awm ṭhin thu a sawi a, "A ṭha lo tak zet a ni," a ti.

Nimina SCERT Auditorium-a ‘Connected Learning Initiative (CLIx) in Mizoram’ tih a hawnnaah thu sawiin H Rohluna chuan, "Sikul tam takin computer set an dawnte hman loha an dah mai mai leh zirtirtu ṭhenkhat-in mahni personal computer-a hmanga in lama an kawl daih ṭhin hi a ṭha lo," a ti a; computer-te chu ṭangkai taka hman tur a nih thu a sawi.

CLIx bul ṭan nana India ram state pali thlan chhuah zinga Mizoram a tel ve chu a lawmawm a tih thu sawiin, Education Minister chuan, "A hlâwkna téltu tur Mizo naupang 24,000 chuang an ni. Mizote hi a hlanga awm, Mizo ṭawng hlira inbe thei kan nih avangin ṭawng dangah harsatna kan tawk ṭhin a, CLIx kaltlang hian chu’ng harsatnate chu sutkian theih a nih ka beisei," a ti.

Hawnna inkhawm hi School Education director K Lal-thawm-mawia'n a kaihruai a; Tata Institute of Social Sciences (TISS) leh Massachusetts Institute of Technology (MIT) aṭanga mi thiam telte'n CLIx chung-changa hriat tur pawimawhte an sawi a ni.

CLIx hi mathematics, english leh science subject-a zirna leh zirtirna ṭha, tlo leh rintlak zawk a awm theihna tur te, high school zirlaite’n mahni inrintawk-na nena bul ṭanna ṭhuthmun an rem fuh thiam theihna tura ruahmanna leh hma lakna a ni. Hemi atan hian TISS leh MIT-te nen Mizoram sorkar leh MZU chuan inremna thu-thlung an ziak fel tawh.

A bul ṭan nan CLIx hi Mizoram chhunga high school 30-ah kalpui phawt a ni ang a, kum hnih chhungin sorkar high school dang 200-ah kalpui hman vek tum a ni.