MNF leh MPC-in Sairengpuii bân an phût

MNF party leh MPC party-te chuan thu-chhuah siamin, Persons with Disabilities (PwD) Commissioner atana sorkar hnathawk pension B Sairengpuii kum thum chhung rawih nawn a nih hnua kum hnih dang atan rawih nawn leh a ni chu pawi an tih thu leh, rawih nawnna sût tura sorkar an phût thu an tarlang.

MNF chuan, B Sairengpuii chu chief minister Lal Thanhawla nupui, Lal Riliani laizawn a nia sawiin, "Hei bakah hian Chief Minister nuphalpa pawh hun rei tawh tak aṭangin Commissioner of Inquiry-ah pension tawh hnu rawih nawn mek a ni," an ti a; Congress sorkar hnuaia lal chhungkaw induhsak bikna uchuak lutuk awm reng chu duhtawk tawh se an duh thu an sawi.

MNF chuan, B Sai-rengpuii'n PwD commissioner hna a chelh chhungin hmalakna langsar leh rualbanlote hamṭhatna tura a hmalak a nei lo niin an sawi a; a bân theih nana MSU leh an thawhpui pawl dangte hmalakna chu an thlâwp thu an sawi bawk.

MPC party pawhin PwD Commissioner ni mek chungchanga MSU leh pawl dangte hmalakna chu an thlawp thu an tarlang a, "Mizoram sorkar hnuaia hna thar siam a har em em lai leh sorkar hnaa awm tawhsate kai sân vena tur dâl zawnga pension tawh rawih nawn leh fo hi ṭha kan ti lo," an ti.

MPC chuan, "Sorkar hnathawk mek lai mi fel tak tak, an dinhmun chelh mekte tlin tak taka kengkawh chhunzawm ve thei tur mi tam tak an awm laia pension tawh a ruai nawn ṭhin hi natural justice bawhchhiatna a ni," an ti a; MSU leh pawl dangte thil ngiat chu ngai pawimawha
chingfel thuai turin sor-kar an phût a ni.