Thingsaiah sikul khâr an tum

Thingsai All NGO Committee chuan thuchhuah siamin, an khuaa high school leh middle school-ah zirtirtu an daih lo hle tih an tarlang a, zirtirtu dah belh tura an ngennate January 2016 chhunga tihhlawhtlin a nih loh chuan February 2016 aṭangin an khuaa sikul zawng zawng khâr an tum thu an puang.

All NGO Committee-ah hian Thingsai khuaa V/C, YMA, MHIP, MUP, MSU leh political party tinte an tel. An thuchhuah chuan, Thingsai H/S chu Mizoram-a high school hmasa pali zinga mi a ni tih sawiin, science zirtirtu a thih avangin hun rei tak science teacher an nei lo tawh tih a tarlang.

Thingsai Middle School-ah kum 2012 aṭangin headmaster an neih loh thu leh Saikuti Middle School-a headmaster chu kum 2008-a a thih hnuah tun thlengin headmaster an la nei lo tih an tarlang a; hei vang hian sikul leh zirlaite'n harsatna tam tak an tawk tih an sawi a ni.