Krismas thilpek leh Krismas-kumthar ruai

Kum 2015 Krismas pualin koh­hran, tlawmngai pawl, ṭhianho leh mimal tam takin mi chanhai zawkte hnenah ṭanpuina an hlân a; Krismas puala ṭanpuina pek hi Mizote'n kan intihhmuh zel niin a lang. Hetih lai hian, December 2015 chhung khan Aizawl Civil Hospital chuan an Poor Fund-ah Rs. 4,04,250 an dawng.

Krismas puala ṭanpuina petute'n an pek tam ber chu damdawi-ina awm damlo harsa te, home hrang hrangte leh khua/veng hrang hranga khawsak harsa zualte an ni a; kohhran, pawl, ṭhianho leh mimalin an pek bakah, Chief Minister's Relief Fund aṭangin sum ṭhahnem tak pek chhuah a ni bawk.

Aizawl Civil Hospital medical supe­rin­tendant Dr Rosangluaia chuan, December 2015 chhung ACH Poor Fund-ah kum dang aiin a lut
ṭha tih sawiin, "Mi inphalte'n Krismas puala ṭanpuina an pek luh tam vang a ni a, damdawi-ina awm mi tam tak tan malsawmna a ni ṭhin," a ti a; ṭanpuina petu mimal, pawl, ṭhianzaho leh kohhrante hnenah lawmthu a sawi.

Tun ṭumah hian Aizawla kohhran lian leh hlun deuh ṭhenkhatin Krismas puala chhawmdawlna an pek chhuah dan leh Krismas-a ruai an siam dante an bihchiang dawn a ni. Heng kan ziah lante hi ṭanpuina pe awmchhunte emaw, a pe tam ber berte emaw an ni lo a, Vanglaini palaiin a biakpawh theih remchangte an ni a; kan ziah lan loh ṭanpuina pe chhuak kohhran tam tak an awm a ni.

Armed Veng Presbyterian Kohhran chuan an kohhran chhunga mi harsate hnenah Rs. 2,500 ṭheuh leh upa kum 70 chung lam 42 hnenah blanket an pe a, damlo paruk hnenah Rs. 2,500 ṭheuh an hlan. Krismas leh kumthar lawmna ruaiah vawk pahnih ve ve leh bawng pakhat ve ve an talh.

Bawngkawn Presbyterian Koh­hran chuan an kohhrana khawsak harsa chhungkaw 90 hnenah Krismas thilpek atan Rs. 3,000 ṭheuh an hlan. Krismas leh kumthar lawmna ruai atan vawk panga leh bawngsa quintal nga ve ve an siam a ni.

Bethlehem Presbyterian Koh­hran chuan an kohhran chhunga chhungkaw 25 hnenah ṭanpuina pawisa Rs. 2,000-5,000 zel an hlan a, kohhran bik thliar loin an veng chhunga kum 80 chung lam mi 53 hnenah shawl an pe. Krismas leh kumthar lawmna ruai atan vawk panga leh bawng pathum ve ve an talh a, Krismas-ah khan Mizoram State Cancer Institute-a awmte ruai an buatsaihsak.

Bungkawn Presbyterian Kohhran chuan Krismas thilpek atan an veng chhunga chhungkaw harsa zualte hnenah Rs. 2,500 ṭheuh an hlan a, an kohhran aṭanga missionary-a chhuak te, bial evangelist-te leh kohhranin a chhawrte hnenah Rs. 2,500 ṭheuh an hlan.

Chaltlang Presbyterian Kohhran chuan damlo, khawsak harsa zual leh tar chak lote hnenah ṭanpuina an hlan a; damlo hnenah Rs. 1,000, khawsak harsa mi 10 hnenah Rs. 3,000 ṭheuh, tar chak lote hnenah Rs. 500 ṭheuh an hlan bakah, kum 2015-a mitthi chhungte hnenah râlna Rs. 3,000 ṭheuh an hlan a ni.

Chanmari Presbyterian Kohhran chuan Krismas thilpek atan an koh­hrana chhungkaw 62 hnenah Rs. 3,000 ṭheuh leh an kohhran aṭanga missionary-a chhuak pariat hnenah Rs. 3,000 ṭheuh an hlan a; kohhranin a rawih mek mi paruk hnenah lawmman Rs. 4,000 ṭheuh an pe. Krismas pual vekin home pangaah Rs. 60,000 an sem chhuak a, TNT hnenah mutbu 407 truck phur khat an pe bawk.

Chanmari Kohhran hian Krismas ruai atan bawng pathum, vawk paruk, arsa kg. 50, sangha kg. 40 an siam a, buhfai no 1,540 an chhûm. Kumthar lawmna ruai atan bawng pahnih leh vawk paruk an talh a, arsa kg. 45 leh sangha kg. 40 an siam tel. Krismas leh kumthar lawmna ruaiah hian New Life Hospital-a damlo, damlo awmpuitu leh thawktu duty-te an kep ṭhin a ni.

Chhinga Veng Presbyterian Kohhran chuan Krismas thilpek atan kum 75 chin chung lam mi 55 hnenah blanket lum an pe a, home pangaah Kohhran Hmeichhiate'n ṭanpuina an hlan. Krismas leh kumthar lawmna ruai atan vawk pathum leh bawng pahnih ve ve an talh.

Dawrpui Presbyterian Kohhran chuan Krismas thilpek atan kum 80 chung lam mi 21 hnenah shawl an pe a, an branch KṬP-in damdawi-in pathumah Rs. 7,000 ṭheuh leh home pathumah Rs. 5,000 ṭheuh an pek bakah, home dang paliah thawmhnaw ṭhahnem tak an pe. Krismas leh kumthar ruai atan vawk pali ve ve leh bawngsa kg 300 ve ve an siam a ni.

Khatla Presbyterian Kohhran chuan an kohhran aṭanga mis­sionary-a chhuak mi 13 hnenah Rs. 1,000 ṭheuh an pe a, kum 70 chung lam paruk hnenah Rs. 2,000 ṭheuh an hlân a; Krismas leh kumthar lawmna ruai atan vawk pathum leh bawng pahnih ve ve an talh.

Ramhlun North Presbyterian Kohhran chuan Krismas thil pek atan an kohhran chhunga rethei, damlo leh upa mi 150 hnenah Rs. 2,64,000 an sem ral a, kohhran hmeichhiain missionary 20 hnenah Rs. 2,000 ṭheuh an hlân. Damlo rethei mi 13 hnenah Rs. 26,000 an sem ral a, Cancer Hospital khualbuk tan refrigerator, dâl leh buhfai an pe. KṬP lamin Hermon Children's Home-ah Rs. 15,600 an pe bawk. Krismas leh kumthar lawmna ruai atan vawk pali leh bawng pahnih ve ve an talh a ni.

Zarkawt Presbyterian Kohhran chuan kum 2015 Krismas pualin an kohhrana upa, kum 70 chung lam mi 89 hnenah blanket lum an pe a, kohhrana thawktu leh sikula an rawih zawng zawng hnenah lawmman Rs. 2,000 ṭheuh an pe a, home pangaah Rs. 10,000 ṭheuh an hlân.

Zarkawt branch KṬP chuan home hrang hrangah cheng nuai khat hû bungrua leh thawmhnaw an hlan a; an Kohhran Hmeichhiate pawhin home hrang hrangah ṭanpuina sum an pe a, Pavalai Pawlin cheng nuai hnih an sem chhuak bawk.

Zarkawt Kohhran hian Krismas ruai atan bawng pahnih leh vawk pali an talh a, kumthar lawmna ruai atan vawksa leh kelsa hmangin ruai an ṭheh a ni.

BCM Ramhlun North Kohhran chuan Krismas thilpek atan Hermon Children's Home hnenah Rs. 10,000 an hlân bawk.