Bank account hralhah fimkhur turin chah

Mizoram police-te chuan thuchhuah siamin, tun hnaiah mahni bank account emaw bank account hawng chawpa passbook, ATM Card leh PIN mi dang hnena hralh ṭhin an awm tih an tarlang a, fimkhur turin mipui an chah.

Police-te chuan, bank passbook, ATM Card leh PIN-te chu hlêp neia hralh chhâwn leh tura lei khawmte pawh an awm tih an tarlang a, "Bank account hralhtute hian an thil tih hi sual pawi tak leh a hnua mipuite bumna hmanrua ṭha tak a ni tih an ngaihtuah thleng lo ṭhin. Account hralhte hmangin misualte'n mipui pawisa an bum chhuak ṭhin a, sum thianghlimlo (black money) dah lailâwk leh siam thianghlim nan te, terrorist-te'n sum awlsam taka chet veltir nante leh cyber crime tih nante an hmang ṭhin," an ti.

Police-te chuan bank account hralh chungchangah fimkhur turin mipui an chah a, bank account-te mi dang hnenah hralh lo tur leh hmantir lo turin an ngen bawk.