KHAWTHLIR

Lunglei traffic

Lunglei SP chuan lirthei pung zel avangin Lungleia lirthei tlan dan ruahmanna thar a puang. Ruahmanna thar ang chuan, Lunglei Bazar venga Jame Masjid (Mosolman) chhim lam ban kil aṭanga hmar lamah metre 9.25-a thui two wheeler 13 hûn (park)-na tur zuah a ni a; Lunglawnah K Pachhunga in hmar lam kil aṭanga hmar lamah metre 100-a thui LPK (407) truck 18 hûnna zuah a ni bawk.

Rukru man

Mizoram police-te chuan Lalṭanpuia, Khawzawl chu a thawhna, F Laltawnliana, Zarkawt te pawisa Rs. 48,000, Millennium Centre
aṭanga January 18, 2016-a a tlanbopui
avangin an man. Lalṭanpuia hian a pawisa tlanbopui hmangin scooty (Rodeo) leh thil dang a lei hman a, chungte chu chhuhsak a nih bakah, thubuai siamsak a ni.

Sorkar tihdikna

Mizoram sorkar chuan, January 20, 2016-a sorkar thuchhuaha tarlan, State Planning Board din thara board member zinga mi, Principal Secretary to Chief Secretary tih chu Principal Secretary to Chief Minister tih zawk tur a nih thu a tarlang.

Scooty chesualah thi

January 20, 2016 tlai dar 5:45 khan Hunthar Veng lei tlahniamah Rodeo scooty MZ-01 H-1503-in LPK truck MZ-01 L-2299 tlan pelh a tum laiin a tlu a, scooty neitu leh khalhtu Michael Pazawna (43) s/o SH Lalkhama, Ramthar Veng, Aizawl chu truck-in a chîl zui a, damdawi-in panpui a nih laiin a hliam tuar loin a thi. Truck khalhtu hi Denzyl Zothantluanga (27) s/o J Saitluanga, Chaltlang a ni.

Ziakfung Weekly

Lungleia chawlhkar tin chhuak tur chanchinbu thar, 'Ziakfung' tih chu nimin khan Lunglei IPRO Mina Zoliani'n Lunglei Press Club-ah a tlangzarh. Ziakfung weekly-ah hian editor chu V Rokhawlkima a ni.