PIB-in journalist-te tan workshop a buatsaih

Press Information Bureau (PIB), Aizawl chuan nimin khan journalist-te tan Aijal Club-ah workshop buatsaihin Aizawla chanchinbu mite tan thuthar thehdarh kawnga zau zawka thingtlang mipuite tuam theih dan tur an zirho.

'Media workship on Improving Information Dissemination in Rural Areas' hi PIB deputy director Mangjangam Touthang-in a kaihruai a; mi hrang hrangin thuthar thehdarh kawnga hmasawnna tur leh a bikin thingtlang mipuite hnena sorkar kalphung leh hmalakna zau zawka puanzar dan turte an sawifiah.

Mangjangam Touthang chuan, PIB-in sorkar laipui hmalakna leh chanchin thar a puanzar ṭhin dan kalphung a sawifiah a, sorkar laipuiin thu-tlukna pawimawh a siamte leh mipuite hamṭhatna tura hmalakna reng reng PIB website-ah rang taka tarlan ṭhin a nih thu a sawi.

Prominent journalist C Lal-khawliana, Highlander editor-in media-te'n thingtlang mipui tana rawng an bâwl theih dan tur a sawi a; Planning secretary Dr C Vanlalramsanga'n 'Central government assistance for social economic development of Mizoram' tih a sawi.

Vanglaini editor K Sap-danga'n 'Integrity of journalist' tih thupui a sawi a; chanchinbu mite chu engtik lai pawha lái tak leh nghet taka ding reng tura beisei an nih thu te, therhlo leh thil dang hmanga thlêm theiha an awm a remchan loh thute sawiin, "Chanchinbumi nihna chu chem hriam tak anga hmanraw thil ti thei tak ni mah se, mite chungtlakna atan hman chi a ni lo a, mawhphurhna ṭha taka hlen chhuah hi zahawmna kengtu zawk a ni," a ti.

Doordarshan assistant news editor J Malsawmzuala Van-chhawng-in 'Media ethics & art of reporting' tih sawiin, Court hmanga rorelna dik leh lai taka kalpui a nih theihna tura chan-chinbumite mawhphurhna leh Court zahawmna vawnghim chunga lái taka rorelna hlen chhuah a nih theih dan tur a sawi a; Court kaihhnawih thila chanchinbumite tih tur leh tih loh turte a sawifiah.

Aizawl DC Dr Franklin Laltinkhuma'n 'Role of media in crisis management' tih hmangin chhiatna leh harsatna chi hrang hrang a thlena chanchinbumite pawimawhna leh an hnathawh dan tur a sawi a; chhiatna pumpelh thei tura hmalaknaah mi ṭhenkhat, sorkar thupek zâwm ṭha duh lo an awm ṭhin thu te, kalphung hriat loh vanga sorkar ei hêk tum ṭâlh an awm fo thute a sawi bawk.

Workshop-ah hian chanchinbumi ṭhahnem tak an tel a, thupui ṭhen hrang hrangte chu an sawiho a ni.