Rangvamual leh Hunthar Veng atan PWD-in sorkar laipuiah sum dil mek

Aizawl District Disaster Management Authority chairman Dr Franklin Laltinkhuma, Aizawl DC chuan, NH-54, Hunthar Venga lei tlahniam leh Rangvamuala leimin
ṭhin vanga harsatna thleng leh thei vênna atan sorkarin ruahmanna a siam a, sorkar laipuiah sum dil mek a nih thu a sawi.

Nimina PIB-in Aijal Club-a ‘Media workship on Improving Information Dissemination in Rural Areas’ tih an buatsaihah thu sawiin, Aizawl DC chuan, chhiatna a thlena chhawmdawl hna thawhna atan leh State Disaster Response Force fund chu sorkar laipuiiin 90% a tum a, state sorkarin 10% a tum thu a sawi.

Zawhna chhangin Dr Franklin Laltinkhuma chuan, Hunthar Venga lei tlahniam vanga harsatna thleng ṭhin chungchangah, a mawng lama check dam siam nan cheng vbc. 8 hu detailed project report (DPR) sorkar laipuiah PWD-in an thehluh thu a sawi a, “An hmuh ngei a beiseiawm,” a ti.

Rangvamuala leiminin NH-54 a hnawh pin ṭhin chungchangah Aizawl DC chuan, a min tawh lohna tura thil tih dan tur a vân thu a sawi a; chutih rualin, kumin
ṭhál chhungin PWD lamin an khawih leh ang a, min leh mai theiha ngaihte chu an hai thla dawn tih a sawi a ni.

ADDMA Chairman chuan, Aizawlah phalna nei loa in hmun tur lei laih leh in sak a tam thu sawiin, “Thu awih lo an tam a, stay order pek hnu pawhin an sa lui tâlh ṭhin. A neinung zawkte hian sorkar an palzam nasa hle,” a ti.