Saihaah RTI Act chungchang zirho

Mizoram Information Commission (MIC) leh Forum for Social Development of Maraland (FOSDEM)-te chuan nimin khan Saihaa MADC Forest Hall-ah 'RTI Awareness Campaign' an buatsaih a, Mizoram chief information commissioner Lal Dingliana'n a hmanpui.

RTI campaign hi Saihaa IPRO N Vabeiratlua'n a kaihruai a; Lal Dingliana chuan, RTI Act hmanga mipuite'n an zawhnate chu chhan ngei a ngaih thu leh SPIO-te'n mipuite tan hna ṭha tak an thawk a ni tih an hriat a pawimawh thu a sawi a, "RTI Act hi khawtlang leh mi tin tan a ṭha a, corruption vênna ṭha ber a ni," tiin, RTI Act chu tun aia ṭha leh changtlung zawka kalpui tum a nih thu a sawi.

Campaign-ah hian FOSDEM chairman K Riachho pawhin thu a sawi a, "RTI Act-in a tum ber chu langtlang sorkar neih a ni," a ti. Saihaa chief judicial magistrate Dr HTC Lalrinchhana'n RTI Act hman ṭangkai dante a sawi bawk.

RTI Act zirhonaah hian MADC CEM RT Zachono pawh a tel a; Saihaa sorkar department hrang hrang hotu te, V/C member te, tlawmngai pawl hruaitute leh zirlaite an tel a ni.