Sairengpuii bân phutin pungkhawm leh Sorkarin PwD Commissioner a bân

Persons with Disabilities (PwD) commissioner B Sairengpuii bân phûtin nimin khan Vanapa Hall kawtah Mizo Students Union (MSU) huaihawtin zirlaite an pungkhawm leh a; B Sairengpuii chu Mizoram sorkarin PwD commissioner atana a ruat nawnna thupek (order) a sût avangin buaina awm loin zirlaite chu chawhma dar 11:15 velah an ṭin.

Zirlaite hi zing dar 9-ah Vanapa Hall kawtah an pungkhawm ṭan a, dar 10 rîk hma deuhin kawngpui an dang ṭan. Dar 10:30 velah MSU hruaitute leh Aizawl City College Joint Students Union (ACCJSU) hruaitute chu Social Welfare minister PC Lalthanliana'n a banglaah koin an inbia a ni.

Inbiaknaah hian sorkar hotute chuan PwD commissioner aṭanga bân a nih thu an lo hrilh a; revoke order an lo pe a ni.

Inbiaknaah hian Social Welfare Minister bakah, minister dang pahnih - Zodintluanga leh C Ngunlianchunga te an tel a; zirlai hruaitute chu MSU president PC Lalrinhlua'n a ho a ni.

Social Welfare Minister chuan, Mizoram sorkarin zirlaite nena harsatna neih a duh lo tih sawiin, "PwD Commissioner zirlaite'n an duh loh avangin sorkar aiawhin Home Minister-in zirlai hruaitute a dawr a. Chief Minister-in hetianga zirlaite an kal zel hi a duh loh bakah, Home Minister-in a lo intiam tawh angin vawiinah B Sairengpuii bânna order tihchhuah a ni," a ti.

PC Lalthanliana chuan sorkarin zirlaite a ngai pawimawh tih sawiin, "Nimina zirlai leh police innawr buaina pawh kha thleng lo tur a ni a, ṭul loah kut tuar palh an awm a, a pawi kan ti hle," a ti a; MSU-te pawhin rilru ṭha tak an pûa a hriat thu a sawi.

Inbiakna neih zawhah MSU president PC Lalrinhlua chuan Vanapa Hall kawtah thu a sawi a, "Hetiang thil a thleng hi pawi kan ti hle. Home Minister-in a intiam angin hma a la a, B Sairengpuii bân a nih theihna atana a bul tumtu ber a ni. Home Minister leh Mizoram sorkar chungah hian lawmthu kan sawi tak meuh meuh a ni," a ti.

Mizoram Blind Society aiawha thusawitu, an adviser Lalbuatsaiha chuan, zirlaite'n rualbanlote thlavâng hauh a, theihtawp an chhuahpui avangin zirlaite lawmthu a hrilh a; PwD Commissioner thar hnuaiah an dikna chanvote an chan theih tawh ngei an beisei thu a sawi.

Zirlai pungkhawmte chuan resolution point pathum an pass a; PwD Commissioner atan rualbanlote dinhmun hria leh hna tlin tur rang taka ruat an duh thu te, police leh zirlaite innawrnaa hliam tuarte zangnadawmna pek an phût thute leh, PwD Commissioner recruitment rules siam thuai an phût thute an tarlang. Hemi hnu hian zirlaite chu an
ṭîn darh a ni.